Shymkentte sheneýnikter áleýmettik kómekti zańsyz taǵaıyndaý úshin aqsha alǵan

NUR-SULTAN. QazAqparat – Shymkentte jumyspen qamtý ortalyǵynyń sheneýnikteri alaıaqtyq jasap, para alǵany anyqtaldy, dep habarlaıdy QazAqparat QR Sybaılas jemqorlyqqa qarsy is-qımyl agenttigine silteme jasap.

Agenttiktiń Shymkent qalasy boıynsha departamenti qaladaǵy Abaı aýdanynyń «Shymkent qalasynyń halyqty jumyspen qamtý ortalyǵy» KMM Abaı aýdandyq sektorynyń meńgerýshisi alaıaqtyq jasaǵanyn anyqtady.

Ol qyzmet babyn paıdalanyp, ataýly áleýmettik kómek alýǵa kómektesemin dep aldap, 375 myń teńge mólsherinde para aldy degen kúdikke iligip otyr.

«Shymkent qalasynyń halyqty jumyspen qamtý ortalyǵy» KMM-nyń ınspektory da dál osyndaı alaıaqtyq jasaǵany anyqtaldy. Onyń alǵan parasy – 45 myń teńge.

Advokattary aıybyn moıyndap, protsestik kelisim jasaý týraly ótinish tapsyrýyna baılanysty, atalǵan tulǵalar ustalǵan joq.

Kúdiktilerge qatysty sońǵy sheshimdi sot shyǵarady.