Shymkentte «Shekarasyz yntymaqtastyq» halyqaralyq forýmy ótti

ShYMKENT. QazAqparat – Shymkentte «Shekarasyz yntymaqtastyq» halyqaralyq forýmy ótti. Atalǵan sharaǵa álem jastarynyń ókilderi, halyqaralyq jastar qozǵalysynyń jetekshileri men belsendileri qatysty, dep habarlaıdy QazAqparat tilshisi.

Forýmda Shymkent qalasy ál-Farabı aýdanynyń ákimi Ǵabıt Máýlenqulov sóz sóılep, álemniń túkpir-túkpirinen kelgen jastarǵa sharanyń mańyzdylyǵy týraly aıtyp ótti. «Jastar — bul árqashanda qozǵaýshy kúsh, lokomotıv jáne qazirgi kezde júrgizýshi sııaqty qoǵamnyń avangardy. Qazaqstan Respýblıkasynyń Tuńǵysh Prezıdenti-Elbasy N.Á.Nazarbaev 2019 jyldy Jastar jyly dep jarııalaǵan bolatyn. Jyl basynan beri elimizde jastarǵa arnalǵan aıtýly is-sharalar men baǵdarlamalar ótkizildi. Al, jýyrda Jastar jylynyń saltanatty jabylýy bolyp, onda Qazaqstan Respýblıkasynyń Prezıdenti Qasym-Jomart Toqaev Jastar jylynyń dástúrli jalǵasy retinde 2020 jyldy Volonter jyly dep jarııalady. Óıtkeni, ózine paıda izdemeı erikti bolý, bireýge qýanysh syılaý tek boıynda belsendiligi asqan, ómirlik ustanymy joǵary jastardyń ǵana qolynan keledi. Volonterlik – azamattyq qoǵamdy nyǵaıtýdyń mańyzdy quramdas bóligi. Sizderdiń utymdy usynystaryńyz, pikirlerińiz Qazaqstannyń áleýmettik-ekonomıkalyq damýyna óz úlesin qosatyn bolady»,- dedi Ǵabıt Máýlenqulov. Basqosýda qatysýshylar elimizde jastardyń talapty talpynystaryna jol ashylyp, bilim, ǵylym salasynda kóshbasshylyq tanytýlaryna mol múmkindikter jasalyp jatqanyn atap ótti. Bul baǵytta atqarylyp jatqan jumystar barysyn baıandap, aldaǵy josparlarmen bólisti. Birqatar elder arasyndaǵy yntymaqtastyq pen baılanysty nyǵaıtý jaıyn sóz etip, ózara pikir almasty. Kezdesý sońynda ál-Farabı aýdanynyń ákimi búgingi kúnniń jalyndaǵan kemel jastary qatarynan ozyp shyǵyp, bıikterden kórinip júrýine tilegin aıtty.