Shymkentte «Shatqal» baǵdarlamasymen 5 saıabaq salynady
ASTANA. QazAqparat - «Shatqal» baǵdarlamasy aıasynda jańa demalys ornynyń kapsýlasy salyndy. Salynatyn saıaly baqqa «Shymsaıa» dep ataý berildi, dep habarlaıdy oblys ákiminiń baspasóz qyzmeti.
Shymkenttegi Tassaı turǵyn úı alabynyń mańynda ornalasqan 25 ga shatqaldy kógaldandyrý maqsatynda qurylǵan demalys aımaǵynda búgin 1 myń túp aǵash otyrǵyzyldy.
Kógaldandyrý jumysyna oblys ákimimen birlese sol eldi mekenniń turǵyndary, jastar, joǵarǵy oqý ornynyń stýdenteri men ustazdary jáne BAQ ókilderi boz arsha, talshyn shaǵan, emen, katalpa, aqqaıyń aǵashtaryn egip, qalamyzdyń gúldenip, kórkeıýine óz úlesterin qosty.
Atalǵan demalys oryndary óńir turǵyndarynyń taza aýada tynyǵyp, demalýy úshin jasalyp jatqanyn aıtqan ákim onyń tazalyǵy men damýyna birlese kúsh salý qajettigin atap ótti. «Aldaǵy ýaqytta demalys aımaǵyna 6 myń túp aǵash kóshetteri men balalar alańshasy, shahmat jáne doıby alańy, velo joldar men teatraldyq sahna, polıtsııa bólimshesi, sporttyq jattyǵý alańdary salynyp halyq ıgiligine beriledi. Budan bólek bıyl qalada taǵy osy syndy 4 jerdi abattandyryp, saıabaqqa aınaldyramyz. Sonymen qatar, «Shatqal» baǵdarlamasy aıasynda 16 myń gektardan astam alqapty quraıtyn qalanyń jasyl beldeýin qalyptastyrýdy josparlap otyrmyz», - dedi J.Túımebaev.
Elimizdegi tyń jobalardyń biri bolyp tabylatyn bul baǵdarlamanyń basty maqsaty - qaraýsyz qalǵan shatqaldardy halyq demalatyn saıabaqqa aınaldyrý. Bul ádispen salynǵan saıabaqtardy álemniń órkenıeti damyǵan elderi tabıǵı landshafty saqtalǵan dep joǵary baǵalap, súıikti demalys aımaqtarynyń birine aınaldyrǵan.
Mundaı saı-salalar negizinen qalanyń syrtqy aýmaǵynda kóptep kezdesedi. Osy rette qalanyń damýy kenjelep qalǵan shetki aýdandaryn atalǵan baǵdarlama aıasynda abattandyryp, saıabaqqa aınaldyrý jumystary bastalyp ketti. Bul óz kezinde aýa temperatýrasy +40 gradýsqa deıin kóteriletin Shymkenttiń turǵyndary úshin óte yńǵaıly bolmaq. Sonymen qatar, saıabaqta serýendep qana qoımaı, mádenı keshter uıymdastyrylyp, ashyq aspan astyndaǵy amfıteatr qoıylady.
Shymkent qalasynyń bas josparyna sáıkes qala aýmaǵyna jańadan eldi mekender qosylyp, halyqtyń sany artty. Sondyqtan qalanyń ekologııalyq ahýaly men ishki týrızmin jaqsartý jáne qaraýsyz jatqan saılardy saıabaqqa aınaldyrý maqsatynda óńirde «Shatqal» baǵdarlamasy ázirlendi.
Oblys ákiminiń bastamasymen qolǵa alynǵan tyń joba boıynsha aldaǵy ýaqytta qalada 600 gektar shatqaldy jer demalys oryndaryna aınaldyrý josparlanýda. Osy jyly birinshi kezeńdik jumystar sheńberinde qolǵa alynatyn 5 shatqaldyń (97 gektar jerdi quraıdy) bireýi bıýdjet qarjysy esebinen kógaldandyrylyp, saıa jerlerge aınaldyrylsa, qalǵany demeýshiler esebinen júzege asyrlatyn bolady. Osy ispettes abattandyrý jumystary qaladaǵy «Samal-3», «Nursát», «Dostyq» (oń jaq jáne sol jaq) shaǵyn aýdandarynda júrgiziledi.
