Shymkentte sharanany dalaǵa tastap ketken kókek ana baqylaý kamerasyna túsip qalǵan
ShYMKENT. QazAqparat - Shymkentte sharanany týyp, qoqysqa tastap ketken kókek ana baqylaý kamerasyna túsip qalǵan. Polıtseıler kókek anany tabýǵa sol beınetúsirilim sep bolady degen senimde, - dep habarlaıdy QazAqparat HAA tilshisi.
Baqylaý kamerasy jekemenshik medıtsınalyq ortalyqtyń aldyna ornatylǵan. Beınetúsirilimde tolyqsha kelgen kelgen ári tumshalanyp uzyn kúrteshe kıgen kelinshek jan jaǵyna qaraılap, ǵımarattyń janyna ótip ketedi. Bul ýaqyt sábıdiń ómirge kelgen ýaqytymen sáıkes keledi eken. Keıinnen ortalyq qyzmetkerleriniń shyǵyp, qansyraǵan náresteni alyp kirip bara jatqany kórinip tur. Bul túsirilimdi ortalyqtaǵylar jergilikti «Otyrar» telearnasyna beripti. Osy vıdeo arqyly óńirdiń tártip saqshylary kókek anany izdestirýde.
Aıta keteıik, ótken senbide jekemenshik medıtsınalyq ortalyqtyń kúzetshisi ǵımarat janynan jańa týǵan sábıdi taýyp alǵan bolatyn. Keıinnen náreste oblystyq perınataldyq ortalyqqa jetkizilip, sonda em qabyldaýda. Dárigerler jasandy tynys alý apparatyna qosylǵan shaqalaqtyń jaǵdaıy aýyr ekenin aıtady. Al, balasyn týyp, dalaǵa tastap ketken kókek ananyń ústinen qylmystyq is qozǵalyp, izdeý jarııalandy.
