Shymkentte shaǵyn fýtboldan jasóspirimder arasynda týrnır ótti

ShYMKENT. QazAqparat - Shymkentte shaǵyn fýtboldan jasóspirimder arasynda týrnır ótti. 12 komanda baq synǵan saıys El Táýelsizdiginiń 25 jyldyǵy men Konıstıtýtsııa kúnine oraı uıymdastyryldy. Eńbekshi aýdandyq ákimdiginiń muryndyq bolýymen ótken shara tilshi beınematerıalynda, dep habarlaıdy «Qazaqstan-Shymkent» telearnasy.

Sport - densaýlyq kepili. Osy urandy basa nazarǵa alǵandar jańa oqý jylynyń qarsańynda dop teýip, salaýatty ómir saltyn qalyptastyrýǵa kúsh saldy. Igi shara Eńbekshi aýdany aýmaǵynda jańadan boı kótergen sport alańshasynda ótti. Maqsat - jasóspirimderdiń sportqa degen qulshynysyn arttyra otyryp, azattyqty nasıhattaý.

«Biz osymen ǵana shektelmeımiz, bul buqaralyq sportty damytý isi jalǵasa beredi. Óıtkeni damyǵan 30 eldiń qataryna enýi úshin sportshylardy daıyndaý - basty maqsat. Sondyqtan da biz Táýelsizdiktiń 25 jyldyǵy qarsańynda áli tennısten týrnır ótkizbekpiz, voleıbol men basketboldy da qamtımyz. Bul is jalǵasyn tabady», dedi Eńbekshi aýdanynyń ákimi Ǵalymjan Іlııasov.

Atalmysh saıysqa 12- 15 jas aralyǵyndaǵy jasóspirimder qatysty. Osymen úshinshi ret shymyldyq túrgen dodada top jarǵandarǵa arnaıy syılyqtar tabys etildi. Oǵan jetkinshekterdiń alǵysy sheksiz.

«Men 7-shi synypta oqımyn. Osy saıysqa jylda qatysamyn. Maǵan fýtbol oınaǵan unaıdy, shynyqsań, shymyr bolarsyń degen... Men bul fýtboldy oınap sabaǵymdy da tastap ketpeımin, sabaǵym 4 pen 5. Barlyq dostarymdy jáne synyptastarymdy sportpen shuǵyldanýǵa shaqyramyn», dedi  jarysqa qatysýshy Janbolat Tinibek.

Elimizde buqaralyq sportty damytýǵa myqtap den qoıylyp  keledi. Jyl sanap qatary kóbeıgen sport alańshalary sonyń aıǵaǵy bolsa kerek. Aýdan aýmaǵynda bıyldyń ózinde 5 sport kesheni boı kótergen.  Mundaı  is óz jalǵasyn taba bermek, óıtkeni el namysyn álemdik arenada qorǵaıtyn azamattarymyz dál osyndaı shaǵyn alańshalarda tárbıelenetini daýsyz.