Shymkentte saýnanyń jertólesinde jumys istep kelgen kazıno tabyldy

ShYMKENT. QazAqparat – Shymkentte saýnanyń jertólesinde jumys istep kelgen kazıno tabyldy. Zańsyz oıyndy tabys kózi qylǵandardyń jasyrynǵan jerin qalalyq ekonomıkalyq tergeý departamentiniń qyzmetkerleri anyqtady, dep habarlaıdy QazAqparat tilshisi.

Tekserý barysynda 1435 oıyn fıshkasy men 5 koloda, 3 oıyn ústeli jáne 1 beınekamera tárkilendi. Sondaı-aq, zańsyz oıyn zalynda dıler, daıashylar, kassır qyzmet kórsetip kelgen. Oqıǵa kezinde kazınoda 9 oıynshy bolǵan.

Qazirgi tańda atalǵan fakti boıynsha QR QK 307-baby 2-bóligi 2-tarmaǵymen sotqa deıingi tergep-tekserý amaldary bastaldy.

Qylmysqa qatysy bar adamdardyń kinásin sot anyqtaıdy.