Shymkentte sáýlet basqarmasynyń basshysy bıýdjet qarjysyn jymqyrdy dep aıyptalýda

NUR-SULTAN. QazAqparat – Bıýdjet aqshasyn jymqyrdy degen kúdik boıynsha Shymkent qalasynyń sáýlet jáne qala qurylysy basqarmasynyń basshysy ustaldy, dep habarlaıdy QazAqparat tilshisi.

Shymkenttegi sybaılas jemqorlyqqa qarsy kúres qyzmeti qazir is boıynsha sotqa deıingi tergeý amaldaryn júrgizip jatyr.

Habarlanyp otyrǵandaı, kúdikti 2019 jyldyń tamyz aıynan bastap merdigermen sóz baılasyp, iri kólemdegi aqshany jymqyrǵan.

Merdigermen memlekettik satyp alý boıynsha kelisimge kelip, sáýlet jáne qala qurylysy salasyndaǵy jaramsyz topografııalyq túsirilim úshin qarajat aýdarǵan.

«Osy jyldyń 9 maýsymynda basqarma basshysy ustalyp, ýaqytsha oqshaýlaǵyshqa qamaldy. Qazir sotqa deıingi tergeý júrip jatyr», - dep habarlaıdy Sybaılas jemqorlyqqa qarsy is-qımyl agenttiginen.