Shymkentte «Saýda akademııasynyń» jobasy tanystyryldy

ShYMKENT. QazAqparat – Shymkentte keler jyldan bastap satý mamandaryn daıarlaý boıynsha oqytý kýrsy iske qosylady. Bul týraly qalalyq Kásipkerler palatasynyń dırektory Nurlan Qabyshtaev «Saýda akademııasy» jobasynyń tanystyrylymynda aıtty, dep habarlaıdy QazAqparat tilshisi.

Nurlan Qabyshtaevtyń aıtýynsha, atalǵan joba Kásipkerler palatasy jáne «Silkway» halyqaralyq ýnıversıtetimen birlesip qolǵa alynyp otyr. Atalmysh joba osy ýnıversıtetiń bazasynda júzege asyrylmaq. «Biz otandyq óndirýshilerdiń 169 kompanııasylary men saýda jelileriniń, saýda oıyn-saýyq ortalyqtarynyń, saýda úıleri men bazarlardyń sharttary men talaptaryna saraptaý júrgizdik. Barlyǵynda bir jalpy problema baıqalady, ol – ónimdi ótkizý problemasy. Bul saýda ınfraqurylymynyń qazirgi jaǵdaıy men saýdamen aınalysatyn kásipkerlerdiń quzyrettiligi naryqtyń naqty qajettilikterine jaýap bermeıtinin kórsetedi. Endi bul mamandar oqytý kýrsynan ótip, kásipkerlik nysandarda eńbektenetin bolady»,- deıdi Palatanyń dırektory. Mamandardyń sózinshe, búgingi tańda satý boıynsha mamandardy Qazaqstandaǵy birde-bir oqý orny daıarlamaıdy. Birqatar kásiporyndar ótkizý tizbegin damytý jáne satýdy ulǵaıtý maqsatynda (sheteldik keńesshilerdi tartady. Al, atalǵan ýnıversıtette taýarlardy ótkizý, satý jáne logıstıka jónindegi menedjerler daıarlanady. «Kásiporyndardyń saýdasyn damytýda marketıngtiń áserin, sondaı-aq satý salasyndaǵy quzyretterdi damytýdyń mańyzdylyǵyn eskere otyryp, biz kásiporyndardyń quzyretin kúsheıtý qajet dep sanadyq. Osyǵan baılanysty biz «Saýda akademııasyn» qurý bastamasyn usyndyq», - dep atap ótti Palata dırektory. Bıznespen birge ázirlengen oqytý kýrsynyń baǵdarlamasy keń kontıngentke eseptelgen (stýdentter, túlekter, kompanııa qyzmetkerleri, kásipkerler jáne t.b.), oqý merzimi - tájirıbelik sabaqtarǵa basymdyq berilgen 4 aı, oqytý aıaqtalǵan soń tyńdaýshylarǵa sertıfıkattar tabystalady. Jastar kýrstardy keshki mezgilde oqıtyn bolady. Oqytý baǵdarlamasy barlyq qajetti quzyretterdi qamtıdy dep josparlanǵan. Atap aıtqanda, saýda nysandaryn basqarýdyń kásibı daǵdylary, kóterme, bólshek, ınternet-keńistiktegi saýda, satyp alý-satý boıynsha mámilelerdi resimdeý, qol qoıylatyn sharttardy quqyqtyq qamtamasyz etý, ótkizý boıynsha sharýashylyq-qarjylyq operatsııalar, baǵa jáne taýar saıasatyn júrgizý, lızıng operatsııalary, marketıng jáne t.b. Bul jobaǵa oqytý úderisine qatysýǵa, tájirıbe bazalaryn usynýǵa, sondaı-aq kýrs túlekterin jumysqa ornalastyrýǵa daıyn iri kompanııalar jumyldyrylmaq. Osy kompanııalardyń ishki naryqta jáne shetelde satý salasynda tabysty tájirıbesi bar ókilderi dáris oqytýshylar retinde tartylatyn bolady.