Shymkentte sarbazdy sabaǵany úshin áskerı bólimniń eki qyzmetshisi sottaldy

ShYMKENT. QazAqparat -  Shymkenttegi áskerı bólimniń eki merzimdi qyzmetshisi  úshinshi sarbazdy urǵany úshin sottaldy. Shymkent garnızonynyń áskerı soty ekeýine tórt jylǵa bas bostandyǵynan aıyrý týraly úkim shyǵardy, dep habarlaıdy  QazAqparat tilshisi.

Áskerı sottyń sýdıasy Gýlmıra Ýsmanovanyń qaraýymen ótken sot otyrysynda qylmystyq oqıǵanyń qalaı oryn alǵany belgili boldy.

Ótken jyldyń 15 maýsymynda Shymkenttegi 6506 áskerı bóliminiń úsh sarbazy arasynda ózara eregis týyndap, ekeýi úshinshisin sabap tastaǵan. Sóıtip, jábirlenýshige orta dárejedegi dene jaraqatyn salǵan. Sot otyrysy kezinde aıyptalýshy áskerıler óz qylmystaryn moıyndady. Sot ekeýin Qylmystyq kodekstiń 440-babynyń 3-bóligi «2» jáne «4» tarmaǵy («Áskerı qyzmetshiler arasynda baǵynyshtylyq qatynastar bolmaǵan kezde olardyń arasyndaǵy ózara qarym-qatynastardyń jarǵylyq qaǵıdalaryn buzý») boıynsha  kináli dep taýyp, 4 jylǵa bas bostandyǵynan aıyrý jazasyn taǵaıyndady.

Alaıda Qylmystyq kodekstiń 63-baby «Shartty túrde sottaýdy» negizge ala otyryp, jazany shartty túrge aýystyrdy. Sot úkimi áli kúshine engen joq.