Shymkentte sanıtarııalyq talaptardy saqtamaǵan 3 balabaqshaǵa 660 myń teńgedeı aıyppul salyndy

ShYMKENT. QazAqparat - Shymkentte sanıtarııalyq-epıdemıologııalyq talaptardy saqtamaǵan 3 balabaqshaǵa 658 545 teńge aıyppul salyndy, dep habarlaıdy QazAqparat tilshisi.

Shymkent qalasynyń sanıtarııalyq-epıdemıologııalyq baqylaý departamenti jyl basynan beri erekshe tártippen 3 balabaqshany teksergen. Nátıjesinde birshama kemshilikter anyqtalǵan.

Departamentiniń baspasóz qyzmeti taratqan aqparatqa súıensek, keıbir toptarda jıhazdyń tutastyǵy buzylǵan, oıynshyqtar jýylmaǵan, oıynshyqtardy jýýǵa jáne óńdeýge arnalǵan ydystar tańbalanbaǵan. Sondaı-aq, úı-jaılarda bir tıpti shamdar ornatylmaǵan, qorǵanysh quraldarmen qaptalmaǵan. Dezınfektsııalaý quraldarynyń zerthanalyq zertteý nátıjeleri qoldanystaǵy gıgıenalyq normatıvterge sáıkes kelmeıdi. Temperatýrany baqylaý úshin ornatylǵan tońazytqyshtaǵy termometrde isten shyqqan.

Sonymen qatar, balalarǵa satyp alynatyn ónimge olardyń sapasy men qaýipsizdigin rastaıtyn sáıkestik týraly qujattar usynylmaǵan. Toptyq úı-jaılarda jáne medıtsınalyq pýnkt úı-jaılarynda aýa temperatýrasyn baqylaý úshin termometrler ornatylmaǵan.

Shymkent qalasynyń sanıtarııalyq-epıdemıologııalyq baqylaý departamenti júrgizilgen tekserýlerdiń nátıjesinde anyqtalǵan kemshilikter boıynsha jalpy somasy 658545 teńgege 5 aıyppul salǵan.