Shymkentte sadaq atýdan halyqaralyq týrnır bastaldy
ShYMKENT. QazAqparat - Shymkenttiń jeńil atletıka sport kesheninde sadaq atýdan Qazaqstanǵa eńbegi sińgen jattyqtyrýshy, belgili ustaz-bapker Shertaı Ámirbekulyn eske alýǵa arnalǵan halyqaralyq týrnırdiń jalaýy kóterildi.
Alaman saıysqa 6 memlekettiń mergenderi qatysýda, dep habarlaıdy QazAqparat tilshisi.
Oblys sportynyń damýyna aıyryqsha úles qosyp, kóp jyldar joǵary sport sheberligi mektebin basqarǵan Shertaı Ámirbekuly sadaq sportyna qazaq jastarynyń kóptep tartylýyna da eńbek sińirdi. Sonyń nátıjesinde Aınur Ábdiraıymova sııaqty saıypqyrandar olımpıada oıyndaryna qatysty. Bul týraly jarystyń ashylý rásimi kezinde oblystyq sadaq atý federatsııasynyń prezıdenti Ǵanı Tashqaraev aıtyp ótti. Halyqaralyq dárejedegi dástúrli týrnırge Reseı, Belarýs, Grýzııa, Armenııa jáne Orta Azııa elderinen 170-ten asa mergen qatysýda. Jabyq alańdaǵy jamby atýda oblys namysyn Balǵabaı Elshıev basqaratyn joǵary sport sheberligi mektebiniń sadaq atý sheberleri qorǵaıdy. Olardyń qatarynda Rıo olımpıadasyna qatysqan Lýıza Saıdıeva syndy sańlaqtar da bar.
