Shymkentte Respýblıkalyq «Jaıdarman» oıyndary ótti
ShYMKENT. QazAqparat - Shymkentte qala kúni merekesine oraı Respýblıkalyq «Jaıdarman» oıyndary ótti. Shymkent qalasy ákiminiń júldesi úshin uıymdastyrylǵan kóńildi tapqyrlar saıysyna úzdik 11 qurama komandalar qatysty, dep habarlaıdy QazAqparat tilshisi.
«Jaıdarman» oıyndarynda Oral, Taldyqorǵan, Qyzylorda, Taraz, Almaty, Mańǵystaý, Jetisaı, Túrkistan, Shymkent qalalarynyń namysyn qorǵap kelgen komandalar ózara myqtyny anyqtady. Qala ákiminiń kýbogi úshin ótkizilgen aqtyq saıys «Sálemdesý» konkýrsynan turdy. Qatysýshy komandalar 7-8 mınýttyń ishinde bar ónerin salyp, kórermenniń kóńilinen shyǵýǵa tyrysty. Qyzyqty da tartysty ótken saıys qala turǵyndaryna keremet kóńil-kúı syılady.
Oıyn qorytyndysy boıynsha qala kúnine oraı uıymdastyrylǵan jaıdarman saıysynyń jeńimpaz komandalary anyqtalyp, baǵaly syılyqtarmen marapattaldy. Tóreshilerdiń sheshimine sáıkes, birinshi oryn men 1 mln teńge Mańǵystaý oblysynan kelgen «Boranqul» komandasyna buıyrdy. Ekinshi oryn men 300 myń teńge Qyzylorda oblysy, Jańaqorǵan aýdanynyń komandasy ıelendi. Sonymen qatar úshinshi oryn men 200 teńge syılyqqa Maqtaral aýdany, Jetisaı qalasynyń komandasy laıyqty dep tanyldy. Budan bólek, «Úzdik oıynshy» nomınatsııasy boıynsha 100 myń teńge Shymkenttik Ulan Mamyrbekulyna berildi.
