Shymkentte respýblıkalyq mańyzdaǵy qalalarǵa qatysty normalar qoldanylady
Memleket basshysynyń Jarlyǵyna sáıkes, Shymkent qalasy respýblıkalyq mańyzy bar shahar sanatyna jatqyzyldy. Ońtústik Qazaqstan oblysy ataýy Túrkistan oblysy dep ózgertildi jáne onyń ákimshilik ortalyǵy Shymkent qalasynan Túrkistan qalasyna kóshirildi.
Konstıtýtsııalyq zań jobasymen «Qazaqstan Respýblıkasynda saılaý týraly» jáne «Qazaqstan Respýblıkasynyń sot júıesi men sýdıalarynyń mártebesi týraly» konstıtýtsııalyq zańdarǵa ózgerister engizý kózdelgen.
QR Ulttyq ekonomıka mınıstri Tımýr Súleımenovtiń sózine qaraǵanda, atalǵan zań jobasyn qabyldaý zańnamalyq aktilerdiń respýblıkalyq mańyzy bar qalalarǵa qatysty normalaryn Shymkent qalasyna da qoldanýǵa múmkindik beredi.
Sonymen qatar, jalpy otyrysta palata depýtattary «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń ákimshilik-aýmaqtyq qurylysy jáne kóleńkeli ekonomıkaǵa qarsy is-qımyl máseleleri boıynsha ózgerister men tolyqtyrýlar engizý týraly» Zańyn eki oqylymda qabyldady.
«Bul qujat keıbir zańdardyń jekelegen normalaryn ákimshilik-aýmaqtyq ózgeristerge sáıkes keltirýge baǵyttalǵan. Zań jobasynda Shymkent jáne Túrkistan qalalary úshin salyq mólsherlemelerin ózgertý bóliginde Salyq kodeksine túzetýler engizý kózdelgen. Ózgertilgen salyq mólsherlemesin birden engizbeı, ótpeli kezeń berýmen 2020 jylǵy 1 qańtardan bastap engizý usynylady», - dedi T. Súleımenov.
Budan bólek, Túrkistan oblysy ákimshilik ortalyǵynyń kóshirilýine baılanysty Túrkistan qalasynyń 12 aýyldyq okrýgi Kentaý qalasyna jatqyzyldy. Tıisinshe, atalǵan aýyldyq okrýgterge ekologııalyq ústemaqyny saqtap qalý úshin «Aral óńirindegi ekologııalyq qasiret saldarynan zardap shekken azamattardy áleýmettik qorǵaý týraly» Zańyna túzetýler engiziledi.
«Bul túzetýlerdi qabyldaý úzdiksiz áleýmettik qamsyzdandyrý jáne halyqqa memlekettik qyzmetter kórsetý úshin jaǵdaı jasaýǵa múmkindik beredi. Sonymen qatar, osy túzetýler Shymkent qalasy men Túrkistan oblysy memlekettik organdarynyń úılesimdi jumys isteýin qamtamasyz etedi», - dedi Ulttyq ekonomıka mınıstri.