Shymkentte reseılik Elena Malyshevanyń klınıkasynyń ashylýyna qatysty ákim pikir bildirdi
Ortalyq kommýnıkatsııalar qyzmetinde ótken brıfıngide BAQ ókilderi Shymkent ákiminen Reseıde medıtsınalyq telejobalarmen tanylǵan Elena Malyshevamen baılanysy bar klınıka ashýdyń qajettiligi týraly surady.
«Muny jeke menshik klınıka bastaǵan sııaqty. Astanaǵa ushyp kelgen kezde Shymkenttegi BAQ-ta qatty talqylap jatyr eken. Sodan bildik. Búgingi kúnde ol merdiger tarapynan memleketten beretin lıtsenzııaǵa, basqa da qujattarǵa suraý salmaǵan.
Qazir ol merdiger jarnamasyn alyp tastady. Ol metodıka ma, ol jaǵy túsiniksiz. Qosymsha jumys istegennen keıin aqparatyn beremiz. Eger talaptarǵa sáıkes bolsa, biz qujattaryn qarap, zańǵa sáıkes jumys isteımiz. Bizge búginge deıin eshbir aryz túsirgen joq. Aryz bergennen keıin qaraımyz. Memlekette tirkelgen, tirkelmegenin tekseremiz», - dedi ákim.
BAQ ókilderi Elena Malyshevanyń emdeý tásiline baılanysty kúdik kóp ekenin aıtyp, bul másele qanshalyqty zerttelgenin surady.
Murat Áıtenov bul saýalǵa Qazaqstan kóppolıarly syrtqy saıasatty ustanatynyn aıtyp, jaýap berdi.
«Bizdiń syrttaǵy ustanymymyz – bárine ashyq bolý. Kóppolıarly ustanymdamyz. Bárimen dospyz. Onyń ustanymy men emdeý ádistemesi eki bólek dúnıe dep oılaımyn. Sondaı-aq onyń emdeý ádistemesi qandaı ekenin bilmeımin. Ol máseleni áli zerttegen de joqpyz. Zań boıynsha olar Densaýlyq saqtaý mınıstrliginiń medıtsına sapasyna jaýap beretin departamentine ótinim joldaıdy. Ol departament tikeleı mınıstrlikke baǵynady. Eger olarǵa tıisti ruqsat pen lıtsenzııa berilse, tyıym salmaımyz. Óıtkeni bul naryqtyq ekonomıka», - dedi Shymkent ákimi.
