Shymkentte psıhologtardyń keńesi ótti
ShYMKENT. QazAqparat - Shymkentte psıhologtar bas qosyp, qoǵamdy mazalaǵan saýaldarǵa jaýap izdedi, dep habarlaıdy QazAqparat tilshisi.
«Psıhoterapııa, tájirıbelik jáne konsýltatsııalyq psıhologııa: búgini jáne zamanaýı damý tendentsııasy» atty konferentsııaǵa tájirıbeli psıhologtar shaqyryldy. Psıhologııa jáne psıhoterapııa eýrazııalyq ınstıtýty men Ońtústik Qazaqstan Pedagogıka ýnıversıteti ujymy birlese uıymdastyrǵan basqosýda óńirdiń bilim berý jáne densaýlyq saqtaý salasynynyń mamandary jınaldy. Jınalǵandar problemanyń shyǵý tegin zerttep, sheshý joldaryn usyndy.
«Dúnıejúzilik densaýlyq saqtaý uıymy boıynsha Qazaqstan jasóspirimder, jastar arasyndaǵy sýıtsıd jaǵdaıy boıynsha álemde aldyńǵy orynda tur. Jer silkiný, órt, sý tasqyny kezinde adamdarǵa birinshi kezekte psıhologtar alǵashqy kómekti kórsetýi kerek»,- deıdi Ońtústik Qazaqstan Pedagogıka ýnıversıtetiniń rektory Murat Jarqynbekov.
Mamandardyń sózinshe, búginde týystar men tanystardy aıtpaǵannyń ózinde, ata-ana men bala arasyndaǵy baılanys nasharlap barady. Barlyq másele materıaldyq baılyqta dep eseptegen sátten bastap, rýhanııat quldyraýǵa ketedi. «Sondyqtan qandaı jaǵdaı bolmasyn, rýhanııat joǵaryda turǵany durys. Sonda ǵana kóńilimiz jaı, sózimiz isimizge saı bolmaq»,- deıdi psıhologtar.
«Kezinde matematık Albert Eınshteın HHІ ǵasyr psıhologııa ǵasyry bolady degen eken. Sol kemeńgerdiń aıtqan parasatty sózi is júzinde shyndyqqa ulasyp jatqan túri bar. Sebebi, psıhologııa ǵylymy bizdiń ómirimizge myqtap endi. Sheteldegi sııaqty biz qaı salany almasaq ta, psıhologııa mamandyǵy óte qajetti mamandyqqa aınalyp otyr»,- deıdi psıhologııa ǵylymdarynyń kandıdaty Madına Baıbekova.
Jıynda psıhologtardy tolǵandyrǵan mańyzdy máseleler boıynsha baıandamaldar jasaldy. Olardyń kásibı deńgeıin arttyrý da nazardan tys qalmady.
