Shymkentte protsesýaldyq qatelikter máselesi talqylandy
Sotqa deıingi tergep-tekserý barysynda jiberiletin qatelikterden týyndaıtyn máselelerdi talqylaǵan jıynǵa sýdıalar men prokýrorlar, tergeýshiler men advokattar jáne jýrnalıster qatysty. Májiliste atalǵan sottyń tóraǵasy Ábsattar Shahıdınov qylmystyq isterdi sotta qaraý barysynda birqatar problemalyq máseleler týyndaıtynyn aıtyp ótti. Sot tóraǵasy kemshilikteri anyqtalǵan naqty ister boıynsha mysaldar keltirip, sotqa deıingi tergep-tekserý organdary qyzmetkerleri qatelik jibergen isti prokýrorǵa qaıtarýǵa jáne jeke qaýly shyǵarýǵa negiz bolatynyn qadap aıtty. Jıynda sondaı-aq, sýdıalar Ábınur Qarabaev pen Aıjan Medeýbekova osy másele boıynsha problemalyq suraqtardyń qordalanyp qalǵanyn atap ótti.
Sotqa deıingi tergep-tekserý satysynda jiberilgen protsesýaldyq qatelik saldarynan atalǵan sotta aǵymdaǵy jyldyń bes jarym aıynda 9 tulǵaǵa qatysty 6 qylmystyq is qaıtarylǵanyn jetkizdi.
Óz kezeginde Ábsattar Shahıddınov sot isin júrgizýdegi tildik prıntsıpti tilge tıek etip, ony qoldaný sot protsesine qatysýshy adamdardyń quqyqtary men bostandyqtaryn qamtamasyz etýdiń quqyqtyq kepili bolyp tabylatynyn aıtty.
«Qazaqstan Respýblıkasy Joǵarǵy Sotynyń «Sot isin júrgizý tili qaǵıdatyn qoldanýdyń keıbir máseleleri týraly» normatıvtik qaýlysynda kórsetilgendeı Qazaqstanda sot isi qazaq tilinde júrgiziledi, qazaq tilimen qatar resmı túrde orys tili, al qajet bolǵan jaǵdaılarda basqa da tilder qoldanylady. Biraq, búginde atalǵan qaýlynyń talaptary óz deńgeıinde oryndalmaı otyr. Óıtkeni, kóp jaǵdaıda sot isiniń tili sotqa deıingi tergep-tekserý organdarynda aıqyndalady. Sol sebepti, sotqa deıingi tergep-tekserý organdary memlekettik tilge basa nazar aýdarýlary kerek» - dedi sot tóraǵasy qalalyq qylmystyq ister jónindegi mamandandyrylǵan aýdanaralyq sotynda ótken jıynda.