Shymkentte poıyzdyń júk kóligin soǵýyna júrgizýshiniń júrek aýrýy sebep bolýy múmkin
ShYMKENT. QazAqparat - Shymkentte elektrovoz ben «Howonyń» soqtyǵysýyna júk kóligi júrgizýshisiniń júrek aýrýy sebep bolýy múmkin. Bul týraly búgin aýrýhanaǵa túsken júrgizýshiniń týystary aıtty, dep habarlaıdy QazAqparat tilshisi.
Júk kóligin tizgindegen Serik Tashtaevtyń týystarynyń sózinshe jol apatynyń aldynda júrgizýshiniń júregi syr bergen bolýy múmkin. Sebebi, ol buǵan deıin de júrek tusy aýyratynyn eskertken eken.
«Kúıeýim sońǵy kezderi júregim aýyrady dep aıtyp júrdi. Soǵan baılanysty dárigerlerge de qaraldy. Keıin emi qalyp qoıdy. Jalpy júrgizýshilik eńbek ótili 20 jyldan asady», - dedi kelinshegi Sáýle Tashtaeva.
Qazir 47 jastaǵy júrgizýshi aýrýhanada jatyr. Onyń jaǵdaıyn dárigerler ortasha dep baǵalaýda. Jedel neırohırýrgııa bólimine aýystyrylǵan naýqastyń bas jaraqaty bar jáne aıaǵy synǵan. Sondaı-aq, astyńǵy jaq súıegine qatty zaqym kelipti.
Esterińizge salaıyq, temir jol boıyndaǵy jol apaty keshe keshkisin saǵat 16:09-dar shamasynda, Tassaı eldi mekeniniń mańynda bolǵan. Temirjolǵa shyǵyp ketken júk kóligi elektrovozben soqtyǵysyp, poıyz aýdarylyp qalǵan edi. «Howo» aýyr júk kóligi kóligi de myjylyp, bir shetke ushyp ketken. Zardap shekkenderdi alyp shyǵý úshin, óńirdiń tótenshe jaǵdaılar departamentiniń 5 qyzmetkeri men 1 tehnıkasy tartyldy. Qysylyp qalǵan júrgizýshini qutqarýshylar arnaıy gıdroqaıshylardyń kómegimen kabınany kesti. Sodan keıin jaraqat alǵan azamat shyǵarylyp, aýrýhanaǵa jetkizildi. Qazirgi tańda, Shymkent jelilik polıtsııa bóliminiń qyzmetkerleri jol apatyna baılanysty tekserý sharalaryn júrgizýde. Anyqtaý jumystary aıaqtalǵan soń ǵana jol apatynyń sebep saldary belgili bolmaq. 
