Shymkentte polıtsııa qyzmetkeri 2 adamdy kólikpen qaǵyp ketti

ASTANA. QazAqparat - Shymkentte polıtseıdiń qatysýymen bolǵan jol-kólik oqıǵasy boıynsha tergeý júrgizilip jatyr, – dep habarlaıdy Polisia.kz saıtyna silteme jasap.

Saıttaǵy málimetterge qaraǵanda, 3 tamyz kúni saǵat 17:00 shamasynda Baıtursynov kóshesindegi jaıaý júrginshiler ótkelinde Turan aýdandyq polıtsııa bóliminiń júrgizýshi polıtseıi qyzmettik avtokólikpen 2 adamdy qaǵyp ketken. Jol-kólik oqıǵasy saldarynan anasy men kámelet jasyna tolmaǵan qyzy aýrýhanaǵa jetkizildi.

Atalǵan jaıt Shymkent qalasy polıtsııa departamentinde QR QK-niń 345-baby 2-bóligi (Kólik quraldaryn basqaratyn adamnyń abaısyzda adam densaýlyǵyna aýyr zııan keltirýge ákep soqqan jol júrý qaǵıdalaryn buzý) boıynsha tirkeldi.

Qajetti saraptamalar taǵaıyndaldy. Shymkent qalasy Polıtsııa departamentiniń basshylyǵy zardap shekkenderden jáne olardyń týystarynan polıtsııa qyzmetkeri jolda adamdardyń jaraqat alýyna jol bergeni úshin keshirim suraıdy. Sotqa deıingi tergeýmen PD-nyń anyqtaý basqarmasy aınalysyp jatyr. Tergeý barysy Shymkent qalasy polıtsııa departamentiniń bastyǵy Qaırat Dalbekovtiń qatań baqylaýynda.