Shymkentte polıtsııa kóligi aýdarylyp qaldy

ShYMKENT. QazAqparat - Shymkentte polıtsııa kóligi apatqa ushyrady, dep habarlaıdy QazAqparat tilshisi.

Qalalyq PD baspasóz qyzmetiniń málimetinshe, jol apaty búgin tańǵy saǵat 8:30 shamasynda Jibek-Joly men J.Aımaýytov kósheleriniń qıylysynda bolǵan. Jol boıynda júrip kele jatqan «Toyota Camry» markaly avtokóligi jol bermeı, qarsy baǵytta kele jatqan Jergilikti polıtsııa qyzmetiniń «JAC S5» markaly avtokóligimen soqtyǵysqan. Saldarynan polıtsııa kóligi aýdarylyp qaldy.

«Medıtsınalyq kómek kórsetilgennen keıin júrgizýshiler úılerine qaıtarylǵan. Avtokólikterde jolaýshylar bolmaǵan. «Toyota Camry» avtokóliginiń júrgizýshisine qatysty QR ÁQBtK-niń 610-baby 2-bóligimen ákimshilik hattama toltyryldy» delingen habarlamada.