Shymkentte polıtseılerge arnalǵan saıabaq salynady
ASTANA. QazAqparat - Ońtústik Qazaqstan oblysynyń ákimi Beıbit Atamqulov ishki ister departamentiniń qalalyq bólimsheleriniń jumysymen tanysý barysynda Shymkentte polıtseılerge arnalǵan saıabaq salynatyndyǵyn málim etti.
Oblys ákimi qyzmet babynda erlikpen qaza tapqan polıtsııa qyzmetkerleri men osy salada eńbek etken ardagerlerge qurmet kórsetý úshin Shymkent qalasynan arnaıy saıabaq salý múmkindigin qarastyrýdy tapsyrdy.
Sondaı-aq, polıtsııa bólimsheleriniń ǵımarattaryn ýaqyt talabyna saı retteý úshin usynys engizýdi Shymkent qalasynyń ákimi men tıisti qurylymdyq bólimderdiń jetekshilerine júktedi. Qala ákimi óz kezeginde Qarataý aýdandyq ishki ister bólimshesiniń ǵımaratyn jańadan salynyp jatqan «Shymkent sıtı» aýdanynda ornalastyrýdy usyndy. Bólimsheni jańa ınfraqurylymmen jabdyqtaý qajettigin atap ótken óńir basshysy bul jobany qoldady.
Oblys ákimi memleket tarapynan tártip saqshylaryna barynsha jaǵdaı jasalyp jatqanyn aıta kele, osyǵan laıyqty jumys atqarý arqyly el senimin aqtaý qajet ekenin jetkizdi.
Aıta ketken jón, ońtústikqazaqstandyq polıtsııa qyzmetkerleri aldaǵy úsh jylda 350 qyzmettik kólikpen qamtamasyz etiletin bolady. Jasalǵan jaǵdaı olardyń jumys kórsetkishterin jaqsartyp, nátıjeli jumys atqarýǵa sep bolatyny anyq, dep habarlaıdy OQO ákiminiń baspasóz qyzmeti.
