Shymkentte polıtseıler jurttyń qaltasyna túsken áıelderdi ustady
ShYMKENT. QazAqparat - Shymkentte polıtseıler qoǵamdyq oryndarda qalta urlyǵymen aınalysqan áıelderdi ustady. Úsh kúdikti qoǵamdyq kólikter men halyq kóp jınalatyn oryndarda urlyqpen aınalysyp kelgen, dep habarlaıdy QazAqparat tilshisi.
Shymkentte qalta urlyǵyna tosqaýyl qoıý maqsatynda jedel-tergeý toby qurylyp, olarǵa urlyqtyń osy túrimen aınalysatyndardy anyqtaý jáne qylmyskerlerdi ustaý tapsyryldy. Jedel-izdestirý sharalary barysynda osyndaı qylmystarǵa qatysy bar degen kúdikpen úsh áıel qolǵa tústi. Ekeýi Shymkent qalasynyń turǵyndary jáne bireýi Reseı Federatsııasynyń azamaty bolyp shyqty. Tergeý barysynda kúdiktilerdiń 20 qalta urlyǵyna qatysy bar ekendigi anyqtaldy.
Ustalǵandar turǵyndardyń ámııanyn aqshasymen, uıaly telefondaryn jáne basqa da baǵaly zattaryn urlap otyrǵan. Olardy satyp, óz qajettilikterine jumsapty.
Qazirgi tańda úsh áıelge qatysty Qylmystyq kodekstiń «Urlyq» babymen is qozǵalyp, sotqa deıingi tergeý amaldary júrgizilýde. Kúdiktiler qamaýǵa alyndy. Tártip saqshylary sondaı-aq qolǵa túskenderden jábir kórgender bolsa jergilikti polıtsııa bólimderine habarlasýlaryn suraıdy.
