Shymkentte polıtseıler jergilikti turǵynnan geroın tapty

ASTANA. QazAqparat - Shymkent polıtseıleri jergilikti turǵynnan asa iri kólemde geroın tapty, – dep habarlaıdy Polisia.kz saıtyna silteme jasap.

Qala aýmaǵynda reıdtik is-sharalar júrgizý barysynda, keshki ýaqytta Eńbekshi aýdanynyń aýmaǵyndaǵy qaraýsyz qalǵan ǵımarattyń ishinde júrgen er adam polıtseılerdiń kúdigin týdyrdy.

Tártip saqshylarynyń jaqyndaǵanyn baıqaǵan ol ǵımarattan shyǵýǵa asyqty, biraq sol mezette ustaldy. Tekserý barysynda polıtseıler onyń sómkesinen esirtki salynǵan 4 polıetılen paket tapty. Onyń birinde bir rettik dozasy bar untaq salynǵan 49 qaptama boldy.

Jedel ýákilder ustalǵan adamnyń turǵylyqty jerin anyqtap, tintý jumystaryn júrgizdi. 49 jastaǵy azamattyń úıinen eki plastıkalyq konteıner men untaqty esirtki zattary salynǵan bir paket, sondaı-aq olardyń salmaǵyn ólsheýge arnalǵan tarazy tabylyp, tárkilendi.

«Saraptama qorytyndysyna sáıkes, tárkilengen esirtkiniń jalpy salmaǵy 70 gramnan asatyn geroın jáne marıhýana ekeni anyqtaldy»,-delingen habarlamada.