Shymkentte polıtseıler qart sýretshiniń kómegimen talaı qylmysty ashty
ShYMKENT. QazAqparat - Alǵys aıtý kúninde Shymkenttik polıtseıler 80 jastaǵy Nurseıit Ibragımovti quttyqtady. Qylqalam sheberi jarty ǵasyr boıy ishki ister organdarynyń qyzmetkerlerine qylmystardy ashýǵa kómektesip keledi, dep habarlaıdy QazAqparat tilshisi.
Óz isiniń mamany Nurseıit aqsaqal beıneleý óneriniń has sheberi. Ol elý jyldan astam ýaqyt boıy izdeýde júrgen qylmyskerlerdiń fotorobotyn salyp, qylmystyń ashylýyna kómektesip júr. Sondyqtan tártip saqshylary sýretshige kúdiktiniń kelbetin qaǵazǵa túsirý úshin únemi onyń kómegine júginedi. Osylaısha Nurseıit Álimbaıuly qanshama qylmyskerdiń ustalýyna qolǵabys etip, ustalǵandary óz jazasyn alýda.
Máselen, ótken jyly bir áıel mektepten bala urlap ketti. Osy kezde qarııa kýágerlerdiń aıtýymen kúdikti áıeldiń fotorobotyn salyp berdi. Sol arqyly kúdikti áıeldi bir kúnniń ishinde polıtsııa ustap, qamaýǵa aldy.
Budan bólek aqsaqal mereke kúnderi gúl satyp turǵan jigitti atyp ketken qylmystyń ashylýyna da óz septigin tıgizdi. Ol qylmyskerdi tabý úshin oqıǵa bolǵan jerge baryp, bazarda turǵan kýágerlerdiń aıtýy boıynsha kúdiktiniń fotorobotyn salyp bergen.
Bir aptadan keıin sýreti salynǵan sezikti tártip saqshylarynyń qolyna tústi. Qylqalam ıesi salǵan sýrettiń arqasynda qylmys ashylyp, qylmysker tıisti jazasyn aldy.
Osyndaı eren eńbegin eskergen Ál-Farabı aýdanynyń polıtseıleri Nurseıit Ibragımovqa kásibıligi men eńbekqorlyǵy úshin alǵysyn aıtyp, myqty densaýlyq pen ónerdegi kásibine tabys tiledi. Óz kezeginde seksendi alqymdaǵan el aǵasy polıtseılerge dán rıza bolyp, jumystaryna tabys, qylmystardyń kóptep ashylýyn tiledi.
