Shymkentte polıtseıdiń ólimine kináli dep tanylǵan bas dáriger sottaldy

ShYMKENT. QazAqparat - Shymkentte polıtsııa qyzmetkeriniń ólimine kináli dep tanylǵan jeke klınıkanyń bas dárigeri sottaldy. Ál-Farabı aýdandyq soty aıyptalýshyǵa 2 jylǵa shartty jaza taǵaıyndady, dep habarlaıdy QazAqparat tilshisi.

Bir aıǵa jýyq qaralǵan sot otyrysy kezinde aıyptalýshynyń kinási tolyq dáleldendi. Іsti qaraǵan sýdıa Erkin Ospanovtyń sózinshe, aıyptalýshy Qylmystyq kodekstiń 317-baby 3-bóligimen («Medıtsına nemese farmatsevtıka jumyskeriniń kásiptik mindetterin tıisinshe oryndamaýy, abaısyzda adam ólimine ákep soqqan is-áreketter») kináli dep tanylyp, tıisti jaza taǵaıyndalǵan. Jábirlenýshilerge materıaldyq shyǵynnyń tólenýine baılanysty taraptar ózara tatýlasqan. Sondaı-aq, kináli tulǵaǵa 3 jyl kóleminde medıtsınalyq qyzmetpen aınalysýǵa tyıym salyndy.

Eske salaıyq, ótken jyldyń 25 qyrkúıek kúni Shymkentte jeke klınıkaǵa qaralýǵa barǵan polıtsııa qyzmetkeri qaıtys bolǵan edi. Marqumnyń týystary 29 jastaǵy polıtseıdiń jeke klınıkaǵa júkti áıelimen birge baryp, ondaǵy medıtsına qyzmetkerleri sap-saý jigitke ekpe jasamas buryn synama alǵanyn aıtqan bolatyn.