Shymkentte polıtseıdi pyshaqtap ketti
ShYMKENT. QazAqparat - Shymkentte polıtseıdi pyshaqtap ketti. Keleńsiz jaǵdaı tártip saqshylarynyń kóshelerdi baqylaý kezinde bolǵan, dep habarlaıdy QazAqparat tilshisi.
Qalalyq ІІD baspasóz qyzmetiniń habarlaýynsha, polıtseıler avtoturaqtardyń biriniń mańynda kúdikti adamdardy baıqap qalǵan. Olardyń tulǵalaryn anyqtamaq bolǵanda, bireýi qashýǵa árekettenedi.
Ýchaskelik polıtsııa ınspektory sol mezette onyń artynan qýyp, ustaý kezinde sezikti polıtsııa qyzmetkerine qarsylyq tanytqan. Tipti birneshe ret pyshaq jaraqatyn salǵan. Soǵan qaramastan jaralanǵan tártip saqshysy kúres ádisin qoldanyp, qylmyskerdi ustaǵan. Jaraly polıtsııa qyzmetkeri qalalyq aýrýhanalardyń birine jetkizilip, oǵan medıtsınalyq kómek kórsetildi.
«Qazirgi tańda kúdiktiler ýaqytsha ustaý oqshaýlaǵyshyna qamaýǵa alynyp, olarǵa qatysty Qylmystyq kodekstiń «Quqyq qorǵaý organy, arnaýly memlekettik organ qyzmetkeriniń, áskerı qyzmetshiniń ómirine qolsuǵýshylyq» babymen sotqa deıingi tergep, tekserý amaldary júrgizilýde», delingen habarlamada.
