Shymkentte polıtseı poıyz astyna túspek bolǵan jasóspirim qyzdy qutqarǵan

ShYMKENT. QazAqparat – Shymkenttik polıtseı Jánibek Ómirbekuly poıyz astyna túspek bolǵan jasóspirimdi qutqaryp qaldy. Polıtsııa kapıtany batyldyq tanytyp, jas qyzdy ajaldan arashalap qalǵan, dep habarlaıdy QazAqparat tilshisi.

Shymkent qalalyq PD ýchaskelik polıtsııa ınspektory Jánibek Ómirbekuly ishki ister organynda 2013 jyldan beri qyzmet etedi. El tynyshtyǵyn kúzetip, túrli quqyq buzýshylyqpen kúres kezinde kún saıyn san myń qaýippen betpe-bet kelip, óz ómirin qaterge tigedi.

Bıylǵy 26 naýryzda shamamen saǵat 18:15-de ol áriptesterimen birge karantındik talaptardyń jáne qoıylǵan shekteýlerdiń oryndalýyn baqylaý júrgizgen. Baqylaý barysynda olar alystan kele jatqan poıyzdyń astyna temir jol relsine jatpaq bolǵan 17 jasar jasóspirimdi baıqap qalǵan.

Polıtsııa kapıtanyna qyzdy qutqaryp qalýǵa janyndaǵy áriptesteri Dáýren Maırıhov, Birjan Saǵynbaev, Dáýlet Abýbakırov kómektesken. Qutqarylǵan jasóspirim qyzdyń ata-anasy jáne jergilikti turǵyndar kózine jas alyp, polıtsııa qyzmetkerlerine alǵysyn aıtqan.

Polıtsııa qyzmetkerleri sýıtsıd jasamaq bolǵan jas qyzdy polıtsııa basqarmasyna jetkizip, profılaktıkalyq suhbat júrgizgen. Nátıjesinde jasóspirim óz qateligin túsingen.

Jasaǵan erligi úshin Jánibek Ómirbekuly Іshki ister mınıstriniń «Quqyq tártibin qamtamasyz etýge qosqan úlesi úshin» medalimen marapattalǵan.

Ol azamattarǵa kómektesý, qorǵaý jáne qutqarý - óziniń basty mindeti ekenin aıtady.