Shymkentte pnevmonııamen jansaqtaý bólimine túsken 15 jastaǵy jasóspirim jazylyp shyqty

ShYMKENT. QazAqparat – Shymkentte ókpesi qabynyp túsken 15 jastaǵy jasóspirimniń jaǵdaıy jaqsardy. Naýqas qalalyq klınıkalyq balalar aýrýhanasyna 27 maýsym jetkizilip, birden jansaqtaý bólimine jatqyzylǵan bolatyn, dep habarlaıdy QazAqparat tilshisi.

Balanyń jaǵdaıy aýyr bolǵandyqtan, oǵan reanımatsııalyq em-dom jasalǵan. Dárigerler ózdiginen demala almaǵan naýqasty oksıgenatsııa apparatyna qosyp, oksıgenoterapııa jáne vırýsqa qarsy terapııa emin úzdiksiz júrgizgen. Ókpesiniń 50 paıyzy zaqymdanǵan jasóspirim dárigerlerdiń qatań baqylaýynda bolyp, der kezinde kórsetilgen kómektiń nátıjesinde 10-shy kúni jansaqtaý bóliminen pýlmonologııa bólimshesine aýystyryldy. Keıinnen naýqastyń demikpesi azaıyp, dene qyzýynyń gemodınamıkasy qalypqa túsken.

Densaýlyǵy jaqsarǵan jasóspirimdi medıtsına mamandary úıine aýrýhanadan shyǵardy.