Shymkentte pnevmonııamen aýyrǵandar sany 5,8 esege artty

ShYMKENT. QazAqparat – Maýsym aıynyń sońynda Shymkent qalasynda pnevmonııamen aýyrǵan naýqastar sany 5,8 esege, jiti respıratorlyq vırýsty ınfektsııaǵa shaldyqqandar 2 esege ósti. Bul týraly qalalyq ákimdiktiń apparat basshysy Erkeǵalı Álimqulov aıtty, dep habarlaıdy QazAqparat tilshisi.

Erkeǵalı Álimqulovtyń sózinshe, qazirgi tańda naýqastardy emdeý úshin bir mektep pen kolledjden, Jeńil atletıka sport kesheninen qosymsha provızorlyq tósek oryndar daıyndaldy.

«Búginde qalada naýqastardy emdeý úshin 2870 tósek orny bar. Onyń 650-i juqpaly aýrýhanalarǵa, 2220-sy provızorlyq orynǵa arnalǵan. Osyǵan baılanysty jedel járdem qyzmetine qońyraý shalatyndar 5 esege kóbeıdi. Orta eseppen bir kúnde 2100-ge jýyq shaqyrtý túse bastady. Shaqyrtýlarǵa der kezinde qyzmet kórsetý úshin Shymkent qalasynyń ákimi M.Áıtenov arnaıy tapsyrma berdi. Osy tapsyrmaǵa sáıkes qalada provızorlyq oryndar men kúndizgi statsıonarlardy kóptep ashyp jatyrmyz. Búginde Samal-3 shaǵynaýdanyndaǵy jańa mektepten 400 oryndyq provızorlyq oryn, Polıtehnıkalyq kolledjden 150 oryn ashyldy. Al aptanyń sońyna deıin 400 orynǵa jetkiziledi. Sondaı-aq, búgin Jeńil atletıkalyq sport kesheninen 150 oryn daıyndaldy jáne 1 shilde kúni ol 450 orynǵa jetkiziledi»,- dedi ol.

Aıta keteıik, qalada juqpaly dertke shaldyqqan naýqastardy emdeý maqsatynda provızorlyq oryndardan bólek, kúndizgi statsıonarlyq emdeý jumystarynyń da qyzmeti kúsheıtilýde.

Pnevmonııa jáne JRVI dertine shaldyqqan naýqastar endi emhanalarda da em qabyldaı alatyn boldy. Bul úshin memlekettik jáne jekemenshik medıtsınalyq uıymdarda kúndizgi statsıonardyń tósek qory keńeıtildi. 14 memlekettik emhanada jáne 26 jekemenshik medıtsına ortalyǵynda 623 tósek-oryn daıyndalǵan. Onda naýqastar tańerteńgi saǵat 8:00-20:00 deıin kúndizgi statsıonarda em qabyldaı alady. Mamandar dárigerdiń taǵaıyndaýy boıynsha naýqastarǵa tamyrdan jáne jambastan ekpe salý syndy emdeý sharalaryn júrgizedi.