Shymkentte pnevmonııamen aýrýhanaǵa 6 myń adam jatqyzylǵan
Qala ákiminiń sózinshe, 7 shildedegi jaǵdaı boıynsha, óńirde qaýipti indetten 18 adam qaıtys bolǵan. Qalalyq juqpaly aýrýhanalardaǵy tósek-orny 160-tan 650-ge jetkizildi. Al, provızorlyq statsıonarlardaǵy oryn sany 3010 bolyp otyr. Qalada sondaı-aq, pnevmonııamen tirkelgen naýqastar sany da ósken. Kúni búginge deıin 6340 naýqas syrqattanǵan bolsa, onyń ishinde 6060 adam (95,6 %) aýrýhanaǵa jatqyzylǵan. Olardyń arasynda 3639 adam (60 %) emdelip shyqqan. JRVI-men 11 891 adam aýyryp, 535 adam (4,5 %) aýrýhanaǵa jatqyzylǵan.
«Jedel járdem qyzmetine 1 maýsymnan 6 shildege deıin shaqyrtýlar sany eki esege ósip, 59 925 jetken. Call-ortalyǵy (109, 1430) iske qosyldy. Koronavırýske arnalǵan tósek-oryndar 300-den 650-ge kóbeıdi. 26 jerden 3110 tósek-oryndyq provızorlyq statsıonar ashyldy. Aýyr dárejedegi naýqastarǵa 136 jansaqtaý tósek orny daıyndalyp, búginde 95 paıyzǵa tolǵan. Alǵashqy medıtsınalyq kómek kórsetý uıymdarynyń bazasynda qosymsha 628 tósek-orny ashylyp, jeńilatletıkalyq sport kesheniniń bazasynda 360 tósek-oryn uıymdastyryldy. Jergilikti óndirýshiler 5 mıllıonnan astam kóp qoldanylatyn maska men 100 tonna dezınfektsııalyq zat, 170 myń flakon jáne 192 myń lıtr spreı shyǵardy»,- dedi Murat Áıtenov.
Shahar basshysynyń aıtýynsha, qalada 56 mobıldi top qurylǵan. Bul top músheleri 10 341 naýqasqa qyzmet kórsetip, 26 380 adam ALO mobıldi tobynyń qyzmeti boıynsha dári-dármekpen qamtylǵan.
«Qalada 10 iri kóterme dári-dármek jáne medıtsınalyq qural-jabdyq jetkizip berýshi mekeme men 560 dárihana jumys atqarady. Baǵany baqylaý men alypsatarlyqtyń aldyn alý maqsatynda 4 monıtorıngtik top quryldy. Emdeý oryndarynda 323 jasandy tynys alý (IVL) apparaty bar. 6 aýrýhanada arnaıy kıslorod stantsııalary ornatylýda. Medıtsına qyzmetkerlerin qoldaý maqsatynda 2 764 adamnyń eńbek aqylaryna 780 mln teńge ústemeaqy tólendi. Halyq qory jáne demeýshiler esebinen 935 medıtsına qyzmetkerine 42,4 mln teńgege materıaldyq kómek kórsetildi. Juqpaly aýrýlar aýrýhanasynyń naýqastarmen tyǵyz baılanystaǵy 336 qyzmetkeriniń qonaq úılerde turý, tamaq berý, jumysqa qatynaýy uıymdastyryldy», - dedi Murat Áıtenov.
Aınur Aqbaeva
