Shymkentte pırotehnıkalyq ónimder saýdasy qatań baqylaýǵa alynǵan - TJD
Madııar Jaqsybaevtyń aıtýynsha, bul sharalar jańa jyldy toılaý kezinde pırotehnıkalyq zattardy qoldaný barysynda oryn alatyn jazataıym oqıǵalardyń aldyn alý maqsatynda júrgizilip otyr. Sebebi, jeltoqsan aıynyń sońǵy kúnderi otshashýdyń saldarynan dene jaraqatyn alǵan nemese «petarda» atamyn dep qolyn kúıdirgen azamattar, balalar aýrýhanaǵa jıi túsip jatady. Jarylǵysh zattan japa shegetinderdiń basym kópshiligi - balalar. Sondyqtan, tótenshe jaǵdaılar departamentiniń mamandary ata-analar balalarǵa otshashýdyń qanshalyqty qaýipti ekenin túsindirip, tyıym salý qajettigin eskertedi.
«Jańa jyl taıap qaldy. Qala aýmaǵynda osy merekeni ótkizetin 567 oryn jáne Prezıdent shyrshasyna arnalǵan bir alań belgilengen. Sol oryndardyń órt qaýipsizdigin qadaǵalap, kezekshilik uıymdastyrylýda. Bizdiń mamandar 5 qańtarǵa deıin qalada kúsheıtilgen rejımde jumys isteıdi. Jańa jyl merekesin qaýipsiz qarsy alaıyq», - dedi Madııar Jaqsybaev.
Tótenshe jaǵdaılar qyzmetiniń basshylyǵy qala turǵyndaryna saqtyq sharalaryn saqtaýdy eskertip ótti.
«Qala turǵyndaryna aıtarymyz, saqtyq sharalaryna kóbirek nazar aýdaryńyzdar. Qys mezgilinde mindetti túrde daýyldy eskertýlerge kóńil bólý qajet. Uzaq jol saparǵa shyqpas buryn oblystyq jáne respýblıkalyq mańyzy bar joldardyń jaı-kúıi týraly «112» nemese 33-74-84 telefondary arqyly bilseńizder bolady. Osy oraıda sizderge «Dármen» tegin qosymshasyn júktep alyp, paıdalanýdy usynamyz. Sebebi bul qosymshada joldardyń jabylýy men ashylýy týraly, basqa da tótenshe jaǵdaılar týraly habarlamalar jedel túrde jetkiziledi. Sonymen qatar túrli tótenshe jaǵdaılar kezinde jasaıtyn is-qımyldar týraly paıdaly aqparatty ala alasyzdar», - dedi departament basshysynyń orynbasary.
