Shymkentte paramen ustalǵan sheneýniktiń isi sotta qaraldy
ShYMKENT. QazAqparat - Shymkentte paramen ustalǵan oblystyq ishki saıasat basqarmasynyń basshysy Bolatbek Tólegenge qatysty búgin alǵashqy sot otyrysy bastaldy. Sotqa qatysqan prokýror sheneýniktiń asa iri kólemde para alǵan dep aıyptady, dep habarlaıdy QazAqparat tilshisi.
Abaı aýdanynyń prokýrory Erlan Toqsanbaevtyń sózine qaraǵanda, Bolatbek Tólegen memlekettik satyp alý konkýrsy boıynsha jeńimpaz atanǵan kásipkerden jalpy somanyń 30 paıyzyn, ıaǵnı 2 mln 100 myń teńge kóleminde para talap etkenin aıtady.
«Oblystyń áleýmettik-ekonomıkalyq damý máselelerin, jetistikterin nasıhattaý, qoǵamdyq-saıası damýyn jarııa etý boıynsha materıaldardyń veb-saıtta jarııalanýyn qamtamasyz etý boıynsha ótkizilgen tenderdi jeke kásipker Ibrahım Esjanov jeńip alǵan. Memlekettik satyp alý boıynsha kásipker 7 mln 560 myń teńgeni ıgerý kerek bolyp, basqarma basshysymen kelisimshart túzilgen. Alaıda basqarma basshysy qomaqty aqshadan para retinde 2 mln 100 myń teńgeni talap etedi. Aldymen paranyń 1,5 mln teńgesin Aqparattyq taldaý ortalyǵy memlekettik mekemesiniń bólim basshysy Rýslan Sembıev pen qaramaǵyndaǵy bólim basshysy Shalkeev arqyly shaqyryp alǵan. Keıinnen qalǵan 600 myń teńgeni suratqan. Kásipker esep shotynyń ýaqytsha istemeı turǵanyn aıtqanda, sheneýnik aqshany tez jetkizbese, tıisti qujattarǵa qol qoımaıtynyn aıtyp qorqytqan» »,- dedi sot barysynda memlekettik aıyptaýshy Erlan Toqsanbaev.
Osydan keıin kásipker Esjanov Sybaılas jemqorlyqqa qarsy is-qımyl ulttyq bıýrosynyń Ońtústik Qazaqstan oblysy boıynsha departamentine aryzdanypty. Artynsha sheneýnik qalǵan 600 myń teńgesin alyp jatqan sátte ustalǵan. Eki aıdan astam ýaqyt aralyǵynda júrgizilgen tergeý barysynda onyń qylmysy Qylmystyq kodekstiń 366-baby 3-bóliginiń-1 tarmaǵy «Qorqytyp alý jolymen para alý» boıynsha saralanyp sotqa ótken bolatyn. Alaıda sot otyrysy kezinde basqarma basshysy óz kinásin tolyǵymen moıyndamady. Sonymen qatar ol sotqa BAQ ókilderiniń qatysýyna túbegeıli qarsylyq tanytty.
Aıta keterligi, jábirlenýshi sanalatyn kásipker Ibrahım Esjanov sotqa kelmedi. Ol buǵan deıin oblys ákimdiginiń baspasóz qyzmetinde birneshe jyl qyzmet atqarǵan edi.
