Shymkentte para alǵan qyzmetkerdiń basshysy jaýapqa tartyldy
«Saraptama nátıjesine júginsek, jer máselelerin sheshýge jaýapty qyzmetkerlerdi, mamandardy irikteý jaǵdaıy máz emes. Atap aıtqanda, Pavlodar oblysy jer qatynastary basqarmasynyń basshysy laýazymynda qylmystyq isi toqtatylǵan qyzmetker jumys isteıdi. Aqtóbede «Azamattarǵa arnalǵan úkimet» oblystyq fılıalynyń jer kadastry jáne jyljymaıtyn múlik bóliminiń basshysy qyzmetinde buryn jemqorlyq úshin sottalǵan adam otyr. Mundaı faktiler basqa óńirlerde de kezdesedi. Biz ári qaraı da mundaı faktilerdi anyqtap, laýazymdy tulǵalardy jaýapkershilikke tartý boıynsha sharalar júrgizemiz», - dedi QR Sybaılas jemqorlyqqa qarsy is-qımyl agenttigi Aldyn alý departamentiniń basshysy Anar Jarova tilshilerge arnalǵan brıfıngte.
Onyń aıtýynsha, agenttik usynysymen Shymkent qalasynyń jer qatynastary basqarmasynyń basshysy jer máselelerin sheshýde zańsyz syıaqy alyp, sottalǵan orynbasary úshin tártiptik jaýapkershilikke tartylǵan.
«Prezıdent qyzmetkerleriniń sybaılas jemqorlyǵy úshin birinshi basshylardy jaýapqa tartý týraly tapsyrma bergen bolatyn. Sáıkes túzetýler Parlamentke engizildi, demek jaqynda zańdy túrde basshylarǵa qatysty shara qoldanylady», - deıdi agenttik ókili.
Sonymen birge, jer qatynastary bólimsheleriniń qyzmetkerlerine qatysty tártiptik jazany alyp, negizsiz syıaqy berý faktileri anyqtalǵanyn aıtty.
«Máselen, Ekibastuzda jer qatynastary bóliminiń mamany zańmen tyıym salynǵan tártiptik jazasy bola tura, 70 myń teńge syıaqy alǵan. Aqmola oblysynda qyzmetkerden jazany alyp tastaý jáne syıaqy berý bir kúnde iske asyrylǵan. Jazany tez alyp tastaýdyń eshqandaı aldyn alý áseri bolmaıdy, bul qyzmetkerge jazalanbaý sezimin uıalatyp, jemqorlyqqa jol ashady. Mundaı jaǵdaılarǵa turaqty túrde monıtorıng júrgizip otyramyz», - dedi Anar Jarova.
