Shymkentte ózenge batqan búldirshindi qutqarǵan oqýshylar marapattaldy

ShYMKENT. QazAqparat - Shymkent qalasynyń tótenshe jaǵdaılar departamentinde 6 jasar balany qutqarǵan oqýshylar marapattaldy, dep habarlaıdy QazAqparat TJM resmı saıtyna silteme jasap.

Tótenshe jaǵdaılar mınıstri ıÝrıı Ilınniń buıryǵymen Ramazan Amankeldıev pen Erdáýlet Shyńǵyshan balany qutqarǵany úshin alǵys hatpen marapattaldy.

Esterińizge sala keteıik, oqıǵa 10 mamyr kúni Shymkent qalasynyń Igilik turǵyn alabyndaǵy Badam ózeninde bolǵan.

Badam ózenine shomylýǵa kelgen bir top bala kishkentaı búldirshinniń sýǵa batyp ketkenin aıtady.

Alǵashqy sátte buǵan senbegen Erdáýlet pen Ramazan oqıǵa ornyna barady.

Sol mezette sý betinde balanyń denesi qalqyp júrgenin kórip qalyp, qutqarý úshin ózenge sekiredi. Sóıtip balany jaǵaǵa alyp shyǵady.

«Ramazan Amankeldıev qutqarylǵan búldirshinniń ishi isip, ózi kógerip kele jatqanyn baıqaıdy. Tez arada reanımatsııalyq is-áreketter jasaıdy. Ol sharshaǵan soń qasyndaǵy Erdáýlet Shyńǵyshan ári qaraı jalǵastyrady. Toqtaýsyz jasaǵan áreketter nátıjesin berdi. Jas balanyń aýyzynan sý shyǵyp, demala bastaıdy. Ózine kelgen bala ne bolǵanyn túsinbeı jylaıdy. Muny kórgen Ramazan men Erdáýlet qýanyp ketedi. Osylaısha der kezinde eki jasóspirimniń alǵashqy kómeginiń arqasynda kishkentaı bala aman qaldy» delingen habarlamada.

Búgingi kúnniń batyrlary qaladaǵy №128 jalpy orta mektepte oqıdy.

Erdáýlet Shyńǵyshan 8-synypty bitirse, Ramazan Amankeldıev 9-synypty támamadady.

Aıta keteıik, Badam ózeninde shomylýǵa tyıym salynǵan.

Shymkent qalasynda shomylýǵa arnalǵan 13 oryn bar, olardyń tizimi Shymkent qalasy TJ departamentiniń saıtynda tur.