Shymkentte ózbekstandyq taýar óndirýshilerdiń kórmesi ótýde
ShYMKENT. QazAqparat - Shymkentte Tashkent qalasynyń taýar óndirýshileriniń eki kúndik kórmesi bastaldy. Oǵan kórshiles eldegi 230-ǵa jýyq kásiporynnyń 1 myńnan astam ónimi men taýarlary usynyldy, dep habarlaıdy QazAqparat HAA tilshisi.
Atap aıtqanda, kórshi eldiń kásipkerleri tamaq ónerkásibi, qurylys, mashına jasaý, metalýrgııa, hımııa, jeńil ónerkásip, farmatsevtıka, jıhaz, kıim jáne toqyma salasyna qatysty ónimder, kádesyılar men sporttyq taýarlar jáne oıynshyqtar ákelipti.
Atalǵan is-shara aıasynda oblys ákimi Janseıit Túımebaev Tashkent qalasy ákiminiń birinshi orynbasary Nozım Hýsanov bastaǵan delegatsııamen kezdesti. Onda ákim Ózbekstan kásipkerlerimen Ońtústik Qazaqstan oblysynyń aýmaǵynda bir myńnan astam ıaǵnı, saýda, ónerkásip, aýyl sharýashylyǵy, qurylys pen qurylys materıaldaryn óndirý, medıtsına jáne bilim berý salalarynda tabysty yntymaqtastyq ornatylǵanyn atap ótti. Ózbekstandyq kásipkerlerdi birlese jumys isteýge shaqyrdy.
«Bizdiń aımaq bıznesti damytý úshin ınvestorlarǵa qolaıly jaǵdaı jasaýymen erekshelenedi. 2010 jyly Shymkent qalasynda toqyma ónerkásibin damytý maqsatynda «Ońtústik» arnaıy ekonomıkalyq aımaǵy qurylǵan. Sonymen qatar, oblysymyzdaǵy 11 ındýstrııaldy aımaǵynda kásipkerler úshin qolaıly jaǵdaı jasalǵan. Búgingi kezdesý Shymkent pen Tashkent kásipkerleriniń arasynda bolashaq jemisti yntymaqtastyqtyń negizi bolady dep úmittenemin», - dedi aımaq basshysy.
Óz kezeginde, Tashkent qalasy ákiminiń birinshi orynbasary Nozım Hýsanov baýyrlas elderdiń saýda-ekonomıkalyq yntymaqtastyǵynan bólek, mádenı-gýmanıtarlyq baılanysynyń nyǵaıa túsetinine senim bildirdi.
«Búgin biz 900-ge jýyq taýar túrin nazarlaryńyzǵa usynatyn bolamyz. Degenmen, bul bizdiń barlyq áleýetimiz degendi bildirmeıdi. Aldaǵy basqosýlarymyzda da tabysty jetistikterge birge jetemiz degen úmittemin. Jalpy, Qazaqstan men Tashkent arasyndaǵy saýda aınalymy jyldan-jylǵa artyp keledi. Máselen, byltyr Qazaqstannyń Tashkentpen aradaǵy saýda aınalymy 500 mln. AQSh dollary bolsa, bıylǵy jyldyń birinshi toqsanyndaǵy nátıje boıynsha atalǵan soma 150 mln. AQSh dollaryna kóbeıip otyr», - dedi Nozım Hýsanov.
Aıta keteıik, búginde Qazaqstannan Ózbekstanǵa baǵyttalǵan eksporttyń basym bóligi munaı jáne onyń ónimderi men un-jarma ónerkásibiniń ónimderi, astyq, qara jáne tústi metall, tsement, transformatorlar, organıkalyq emes hımııa jáne azyq-túlik ónimderi bolyp tabylady. Al kórshi elden bizge jemis-jıdek, kókónis ónimderi, maqta talshyǵy, toqyma jáne daıyn tigin ónimderi, tyńaıtqyshtar, mehanıkalyq qurylǵylar, plastmassa buıymdary, aǵash jáne gıps pen ózge de túrli materıaldar men matalar ımporttalýda.
