Shymkentte óz qyzyn pyshaqtaǵan áke sottaldy

ShYMKENT. QazAqparat - Shymkentte óz qyzyn pyshaqtaǵan áke sottaldy. Abaı aýdandyq soty 58 jastaǵy turǵynǵa úsh jyl bas bostandyǵyn shekteý jazasyn taǵaıyndady, dep habarlaıdy QazAqparat tilshisi.

Atalǵan sottyń sýdıasy Eleonora Bakırovanyń sózinshe, tergeý barysynda aıyptalýshynyń kinási dálelin tapqan. Alaıda ol aýyr jaraqattaǵan qyzyna alǵashqy járdem kórsetip, jedel járdem shaqyrtqan. Emdik sharalarynyń shyǵynyn kóterip, aýrýhanaǵa úzbeı baryp turǵan. Sotta óz kinásin tolyq moıyndap, ókinetindigin aıtqan. Ákesine qyzy da keshirim bergen. Osy mán-jaılar sot úkimi kezinde eskerilgen bolyp shyqty.

Aıta keteıik, qala turǵyny teledıdar qaraýǵa kedergi keltirgen 28 jastaǵy qyzyna ashana pyshaǵymen eki ret soqqy jasaǵan bolatyn. Arqa tusy aýyr jaraqattanǵan boıjetken aýyr halde aýrýhanaǵa jetkizildi. Der kezinde emdik sharalar jasaýdyń nátıjesinde ol aman qalǵan edi.