Shymkentte ótken balalar jármeńkesine 90-nan asa jas kásipkerler qatysty

ShYMKENT. QazAqparat - Shymkentte «Halyqaralyq balalardy qorǵaý kúni» merekesi aıasynda balalar jármeńkesi ótti. «Shymkent» áleýmettik-kásipkerlik korporatsııasy tarapynan uıymdastyrylǵan sharaǵa 6 - 14 jasqa deıingi 90 bolashaq kəsipkerler qatysty, dep habarlaıdy QazAqparat tilshisi.

Arbatta ótken jármeńkege «Shymkent» ÁKK basqarmasynyń basshysy Rashıd Aıýpov arnaıy kelip, balalardy merekemen quttyqtady, olardyń ata-anasyna alǵys bildirdi. Jármeńkeni aralap, balalardyń eńbegimen tanysqan ol jas balanyń qolynan shyqqan buıymdardyń birin satyp aldy.

«Bul jármeńke osymen ekinshi ret ótip jatyr. Ótken jármeńkege qatysqan 70 balanyń sany bul joly 90-ǵa artty. Biz aldaǵy ýaqytta balalardyń jumysyn saralap, birneshe baǵytty damytýǵa basymdyq beremiz», - dedi Rashıd Aıýpov.

Daıyndyq barysynda balalar «Shymkent business school Y17» atty bıznes-mektebinde trenıngten ótti. Olar saýdadan túsken qarjynyń 10 paıyzyn nashar estıtin balalarǵa arnalǵan mektep-ınternatynda robototehnıka kabınetin jabdyqtaýǵa jumsamaq. Qazirgi tańda ol bólmeni ashý jónindegi joba jasalyp, ony qarjylandyrý qajettiligi týyndaǵan.

Aıta keteıik, mundaı jármeńkeler álemniń 100-den astam elinde ótkiziledi. Oǵan qatysý barysynda balalar kóshbasshylyq, sheshim qabyldaý, qarym-qatynas daǵdylary men jaýapkershilik sııaqty qasıetterdi meńgeredi.