Shymkentte ondaǵan mektep úsh aýysymǵa kóshýi múmkin

Munyń sebebin mamandar bala sanynyń artýymen baılanystyryp otyr. Tipti orynnyń jetispeýinen jeke ǵımarattardy jalǵa alýǵa májbúr ekendikterin aıtýda. Tyǵyryqtan shyǵýdyń jolyn izdegen bilim bóliminiń qyzmetkerleri qazynadan qyrýar qarjy bólip, tozyǵy jetken mektepterdi kúrdeli jóndeýden ótkizýge kirisken.

Bilim uıalarynyń janynan japsarlas ǵımarattar salý josparlanǵan.

Oraz Jandosov atyndaǵy №30 orta mektep 900 orynǵa shaqtalǵan. Ǵımarat 1963 jyly paıdalanýǵa berilgen. Sol ýaqyttan beri kúrdeli jóndeý kórmegen bilim uıasy, sońǵy ýaqytta ustazdar men oqýshylarǵa birqatar qıyndyqtar týyndatqan. Ásirese qys mezgilinde shatyrdan sý aqsa, tozyǵy jetken jylý júıesi jıi isten shyǵyp qalady eken.

«Jyl saıyn aǵymdaǵy jóndeý júrgiziletin. Qubyrlar aýystyrylǵanymen, shirigen tustary kóp edi. Sý aǵatyn. Qubyrlar jarylyp ketetin kezder bolady. Mine endi sonyń barlyǵy 100 paıyz jóndeletin boldy», - deıdi O.Jandosov atyndaǵy №30 jalpy orta mektebiniń dırektory Zareta Saparqulova.

Araǵa 55 jyl salyp kúrdeli jóndeýden ótip jatqan mekteptiń taǵy bir máselesi bar. Munda bala sanynyń kóptiginen oryn jetispeýshiligi baıqalady. Bilim bóliminiń basshylary bul jaǵdaıdan habardar. Aıtýlarynsha, úsh aýysymǵa kóshý qaýpi bar mektepterdiń sany búginde 10-nan asqan.

 «Búgingi tańda qalada úsh aýysymda oqıtyn mektep joq. Biraq sondaı qaýip bar. Halyq sanynyń kóbeıýine baılanysty másele týyndap otyr. Atap aıtar bolsam, 1, 65 jáne 23 mektepterde», - dep atap ótti Shymkent qalalyq bilim bólimi basshysynyń orynbasary Ǵabıt Nysanov.

Qazirgi tańda, úsh aýysymǵa kóshý qaýpi basym bilim uıalarynda qosymsha ǵımarat salý jaıy qarastyrylyp jatyr. Degenmen, keıbir mektepterdiń aýmaǵynda ondaı múmkindik joq. Bilim bóliminiń bergen aqparatyna súıensek, bıyl qaladaǵy 118 nysan aǵymdaǵy, 11 nysan kúrdeli jóndeýden ótedi. Búginde, qajetti qarjy kólemi naqtylanyp, merdiger anyqtalǵan.