Shymkentte olımpıadaǵa kelgen oqýshylardyń jappaı aýyrýynyń sebebi aıtyldy

ShYMKENT. QazAqparat - Shymkentte olımpıadaǵa kelgen oqýshylardyń jappaı aýyrýyna ishek taıaqshasy tobyndaǵy bakterııalar sebep bolýy múmkin. Bul týraly Shymkent qalasy sanıtarlyq-epıdemıologııalyq baqylaý departamenti basshysynyń orynbasary Aldarqul Ahmetov málimdedi, dep habarlaıdy QazAqparat tilshisi.

Shymkent qalasy sanıtarlyq-epıdemıologııalyq baqylaý departamenti júrgizgen zerthanalyq zertteýlerge taǵam úlgileri, sý synamasy, súrtindi jáne ashana qyzmetkerlerinen bakterııa tasymaldaýshylyqqa bakterıologııalyq zertteýge analızder alynǵan. Zertteý nátıjelerinde súrtindilerden ishek taıaqshasy tobyndaǵy bakterııalar tabylǵan. Al, qalǵan synamalar boıynsha áli de jumys júrgizilip jatyr.

«25 naýryzda 15 naýqas bala saýyǵyp, statsıonardan shyǵaryldy. Barlyǵynda bakterıologııalyq zertteýler nátıjesi – teris. Olarǵa «Basqa jáne anyqtalmaǵan gastroenterıt jáne ınfektsııalyq kolıt» qorytyndy dıagnozy qoıyldy. Sondaı-aq, 23 naýryzda №5 jataqhanada turatyn 1 olımpıadaǵa qatysýshy «jelsheshek» dıagnozymen qalalyq juqpaly aýrýlar aýrýhanasyna jatqyzyldy, búginde sonda em qabyldap jatyr» - dedi Aldarqul Ahmetov.

Sondaı-aq, SEQB mamandary júrgizgen zerdeleý jumystarynyń nátıjesinde birshama sharalar qabyldanǵan.

«23 naýryzdan bastap №5 jataqhanada turatyn olımpıadaǵa qatysýshylardy tamaqtandyrý №1 qalalyq mektep-gımnazııasynyń ashanasyna aýystyryldy. Berilgen usynystarǵa sáıkes, oqýshylardyń qatysýymen ótetin olımpıadanyń saltanatty jabylý rásimi toqtatyldy. 2023 jyldyń 3-8 sáýirinde Shymkent qalasynda ótkizý josparlanǵan qoǵamdyq-gýmanıtarlyq baǵyttaǵy respýblıkalyq olımpıadanyń formaty qaıta qaralyp, olımpıada aımaqtarda ótkiziletin boldy» - dedi ol.

Aıta keteıik, budan buryn Shymkentke bilim olımpıadasyna qatysýǵa kelgen ondaǵan oqýshynyń aýrýhanada jatqanyn habarlaǵan bolatynbyz.