Shymkentte óli týǵan sábıdiń júregi bir kún buryn toqtap qalǵan – dárigerler

ShYMKENT. QazAqparat – Shymkentte náresteniń júregi bosanardan bir kún buryn toqtap qalǵan. Túrkistan oblystyq qoǵamdyq densaýlyq saqtaý basqarmasyna qarasty ortalyqtyń dárigerleri osylaı dep otyr, dep habarlaıdy QazAqparat tilshisi.

Aıta keteıik, kúni keshe Gúlnar Tastanbekova esimdi turǵyn qyzy Saltanat Tuıaqbaıdyń №2 oblystyq perınaldyq ortalyqta bosanǵanyn jáne onyń sábıi dárigerlerdiń kesirinen óli týǵanyn aıtyp, kinálaǵan bolatyn. Onyń sózinshe, júkti qyzy perzenthanaǵa ótken jumada túsken. Alaıda birer kúnnen soń tolǵaq bastalyp, dárigerler salǵyrttyq tanytqan. Ol dárigerlerdi «tez arada kesar tiligin jasamaı, sonyń kesirinen nemeremniń júregi toqtap qaldy» dep aıyptaǵan edi.
Bul jaǵdaıǵa baılanysty búgin qoǵamdyq densaýlyq saqtaý basqarmasy tıisti jaýabyn berdi. Mamandardyń málimetinshe, jatyrdaǵy náresteniń júregi ishte jatqanda toqtap qalǵan.
«Saltanat Tuıaqbaı ortalyqqa 7 qyrkúıek kúni gestatsııalyq gıpertenzııanyń jeńil dárejesimen, júktiliktiń 36 apta 1 kún merziminde túsken. Oǵan qatysty medıtsınalyq tekserý júrgizilgen. Naýqastyń jaǵdaıy qanaǵattanarlyq jaǵdaıda edi. Al 9 qyrkúıek kúni jatyr ishindegi balanyń júregi soqpaı qalǵany anyqtaldy. 10 qyrkúıek kúni jas anany ózdiginen bosandyrýǵa áreket jasalyp, ol aman-esen bosandy. 12 qyrkúıekte bosanǵan áıel úıine shyǵaryldy. Qazigi tańda bul jaǵdaıǵa baılanysty tıisti tekserýler júrip jatyr. Onyń qorytyndysy 10 kúnnen soń shyǵady. Ázirge sábı ishtegi ınfektsııa juqtyrýdan qaıtys bolǵan degen boljam bar. Jas ananyń jatyry aman, taǵy da ómirge sábı ákelýge múmkindigi bar» delingen habarlamada.