Shymkentte oqýshyny ózin ózi óltirýge deıin jetkizgen jasóspirim sottaldy

ShYMKENT. QazAqparat - Shymkenttiń Qaınarbulaq eldimekeninde mektep oqýshysyn ózin ózi óltirýge deıin jetkizgen jasóspirimge qatysty sot úkimi shyqty. Túrkistan oblystyq kámeletke tolmaǵandardyń isteri jónindegi mamandandyrylǵan aýdanaralyq soty kámelet jasyna tolmaǵan aıyptalýshyny úsh jylǵa bas bostandyǵynan aıyrdy, dep habarlaıdy QazAqparat tilshisi.

Túrkistan oblystyq soty baspasóz qyzmetiniń málimetinshe, qylmystyq isti qaraý birneshe aıǵa sozylǵan.

«Túrkistan oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynyń úkimimen sottalýshy N.Tursynhan QR Qylmystyq kodeksiniń 194-baby 2-bóliginiń 1,3-tarmaqtarymen («Qorqytyp alý»), 28-babynyń 3-bóligi arqyly («Qylmystyq quqyq buzýshylyqqa sybaılas qatysýshylardyń túrleri») 105-baby 3-bóligimen («Ózin-ózi óltirýge deıin jetkizý») kózdelgen qylmysty jasaǵany úshin kináli dep tanyldy. Oǵan túpkilikti 3 jyl bas bostandyǵynan aıyrý jazasy taǵaıyndaldy. Jazany qylmystyq-atqarý júıesiniń ortasha qaýipsiz mekemesinde óteý belgilengen», - delingen úkimde.

Eske salaıyq, byltyr 10 aqpanda qalanyń irgesindegi Qaınarbulaq saıajaıynda turatyn 11 synyp oqýshysy úıiniń aýlasynda asylyp qalǵan bolatyn. Ol óz ólimine kináli retinde alty adamnyń tizimin jazǵan qaǵaz tastap ketken edi. Osydan keıin qaıǵyly oqıǵa boıynsha Qarataý aýdandyq polıtsııa bólimi tarapynan qylmystyq is qozǵalyp, tergeý amaldary júrgizildi. Osy qylmysqa kúdikti jasóspirim ustalyp, oǵan qatysty is sotta qaralǵan bolatyn.