Shymkentte oqýshylary jappaı ýlanǵan mektepte sabaq ýaqytsha toqtatyldy
Qalalyq bilim bólimi baspasóz qyzmetiniń habarlaýynsha, búgin sabaqqa kelgen oqýshylar úılerine qaıtarylǵan. Al, ıisten ýlanyp, medıtsınalyq kómekke júgingen 45 adamǵa der kezinde kómek kórsetilgen.
Aıta keteıik, keshe Yntymaq yqshamaýdanyndaǵy N54 mektepte oqýshylar men mektep qyzmetkerleri jappaı ýlanyp, toksıkologııalyq aýrýhanaǵa túsken bolatyn. Emdeý mekemesine túsken balalarda bas aınalý, qusý jáne qysqa ýaqytqa esten taný belgileri bolǵan. Bastapqy medıtsınalyq kómek kórsetilgennen keıin barlyǵy úılerine jiberildi. Qazirgi ýaqytta aýrýhanaǵa eshkim jatqyzylmaǵan.
Al, búgin elimizdiń bas sanıtar dárigeri Jandarbek Bekshın bul jaǵdaıǵa mektepten 600 metr qashyqtyqta ornalasqan taratý stansasynan shyqqan tabıǵı gaz sebep bolǵanyn atap ótti. Artynsha Shymkenttiń gaz qyzmeti gazdyń taralýyn der kezinde joıdy. Sol sııaqty saraptama ortalyǵynyń mamandary stansanyń jáne mekteptiń aýmaǵynda zııandy zattardyń bar-joǵyna baqylaý zertteý júrgizip, zııandy zattardy tappaǵan.