Shymkentte oqýshylar úshin «Jas memlekettik qyzmetshi» jobasy júzege asyrylýda
ShYMKENT. QazAqparat - Shymkenttiń ákimdigi «Jas memlekettik qyzmetshi» atty erekshe jobany qolǵa aldy. Jobaǵa sáıkes qala mektepteriniń oqýshylary eki kún boıy qala ákiminiń jumysymen tanysyp, alyp shahardy basqarý isine qatysýda, dep habarlaıdy QazAqparat tilshisi.
Ákimdiktegi jumysty oqýshylar shahar basshysy Nurlan Saýranbaevpen kezdesýden bastady. Ózara pikir almasyp, qyzyqtyrǵan saýaldaryna jaýap aldy. Estelik sýretke túsýdi de umytpady.
«Memlekettik qyzmetkerdiń jumysy ońaı emes. Men Sizderdiń ákimdiktegi naqty jumyspen jaqyn tanysqandaryńyzdy qalaımyn. Keıin dostaryńyz ben jaqyndaryńyzǵa aıtyp júresizder. Olar da qalalyq ákimdiktiń jumysy týraly habardar bolsyn»,- dedi kezdesý barysynda Nurlan Saýranbaev.
Budan soń oqýshylar memlekettik qyzmetkerlerdiń jumysyn birlesip atqaryp kórdi. Jobaǵa qatysýshylardyń biri qala ákiminiń janynda júrse, qalǵan jasóspirimder ákimniń orynbasarlary, aýdan ákimderi, bólim jetekshileri men depýtattardyń rólin atqarýda. Olar búgin kúni boıyna ózderi tańdaǵan memlekettik qyzmetkerlermen birge bolyp, qyzmetterimen tanysady. Shymkentte alǵash ret qolǵa alynǵan jobanyń maqsaty - ákimdiktiń jumysyn ishki jaǵynan kórsetý ǵana emes, jastarǵa mamandyq tańdaýda kómektesý bolmaq.
