Shymkentte oqýshylar ekologııalyq mádenıet jónindegi baıqaýǵa qatysty
ShYMKENT. QazAqparat - Shymkentte «Ekologııalyq ortalyq» MKQK uıymdastyrýymen oqýshylar arasynda shyǵarma jazýdan oblystyq baıqaý ótti.
Oblys ákimdiginiń baspasóz qyzmetiniń habarlaýynsha, saıysqa oblys boıynsha 5-10-synyp oqýshylarynan 312 jumys kelip túsken.
«Ómir tamshysy» jáne «Bulttarǵa aıtyńdarshy, qustar» atty taqyrypta ótkizilgen baıqaýdyń negizgi maqsaty - balalardy tabıǵat týraly áńgime, óleń qurastyra bilýge, janýarlarǵa qamqor bolýǵa tárbıeleı otyryp ekologııalyq tártiptiń negizderin úıretý.
«Órleý» «BAUO» AQ fılıaly OQO boıynsha pedagog-kadrlardyń biliktiligin arttyrý ınstıtýtynyń jáne M.Áýezov atyndaǵy OQMÝ-dyń aǵa oqytýshylary sarapqa salǵan shyǵarmalardyń arasynan úzdigin anyqtaý ońaı bolǵan joq.
Mysaly, «Ómir tamshysy» taqyryby boıynsha aýyzsýdyń jetispeýshiligi, sýdy únemdeýge degen kózqarasymyzdy qalaı ózgertýge bolatyndyǵy, sý resýrstaryn qorǵap qalý barshamyzdyń mindetimiz ekendigi sóz boldy. «Bulttarǵa aıtyńdarshy, qustar» shyǵarma saıysynda týǵan ólkeniń sulýlyǵy, qorshaǵan ortany qorǵaý, avtokólikterdiń atmosferalyq aýany lastaýy týraly máselelerdi oqýshylar óleńmen órnektep berdi.
Qazylar alqasynyń sheshimimen «Bulttarǵa aıtyńdarshy, qustar» taqyryby boıynsha I oryndy Báıdibek aýdanynan kelgen Gúljaýhar Bajaqaı ıelense, «Ómir tamshysy» taqyrybynda ótken saıysy boıynsha shymkenttik Aqgúlim Aqjol jeńimpaz dep tanyldy.
