Shymkentte ókpesine sýyq tıip, jedel járdem shaqyrǵan naýqastar kúrt kóbeıdi

ShYMKENT. QazAqparat – Shymkentte ókpesine sýyq tıip, jedel járdem shaqyrtqan naýqastar sany kúrt kóbeıip ketti. Bul týraly qalalyq densaýlyq saqtaý basqarmasy málimet taratty, dep habarlaıdy QazAqparat tilshisi.

Densaýlyq saqtaý basqarmasynyń málimetinshe, qaladaǵy epıdemııalogııalyq qolaısyz jaǵdaıǵa baılanysty jedel járdemge túsetin qońyraýlardyń sany ósken. Búginde 103 qyzmetine kúnine orta eseppen 1800-2000 qońyraýǵa deıin kelip túsedi.

«Shaqyrtýlardyń basym bóligi - JRVI, pnevmonııa syndy ınfektsııalyq aýrýlar. JRVI dıagnozymen aýrýhanaǵa jatqyzý - 2 ese (2019 jylǵy maýsym – 124, 2020 jylǵy maýsym – 260), pnevmonııa dıagnozymen - 7,2 ese (2019 jylǵy maýsym-18, 2020 jylǵy maýsym -130) ósken. Infektsııalyq aýrýlardyń artýyna baılanysty qalada 1420 tósek-oryn ashyldy. Onyń ishinde 690 oryn ınfektsııalyq, 290-karantındik, 440-provızorlyq tósek-oryn ashylǵan. Osynyń esebinen oryn jetispeý problemasy rettelmek. Sondaı-aq, 22 ókpeni jasandy jeldetý jáne 38 monıtor apparaty qosymsha ornatylǵan. Buǵan qosa, 27 maýsymǵa deıin 40 ókpeni jasandy jeldetý apparaty ornatylady dep josparlanýda» delingen habarlamada.

Basqarmanyń málimetinshe, naýqastardyń aýrý juqtyr kórsetkishiniń artýyna saqtyq sharalarynyń tıisti deńgeıde saqtalmaýy sebep bolǵan.

Turǵyndardyń basym bóligi áli de araqashyqtyqty saqtaý, qol gıgıenasy men maska taǵý syndy saqtyq sharalaryn elemeı otyr.