Shymkentte ógeı áke 6 jasar qyzyn zorlady degen kúdikke ilindi

ShYMKENT. QazAqparat- Shymkentte ógeı áke kámeletke tolmaǵan qyzyna zorlyq-zombylyq jasady degen kúdikke ilindi, dep habarlaıdy QazAqparat tilshisi.

22 tamyzda Turan APB-na habarlasqan jergilikti turǵyn, 6 jasar qyzyna birge turatyn er adamy seksýaldyq sıpattaǵy zorlyq-zombylyq jasaǵanyn aıtyp aryzdanǵan.

Polıtseıler atalǵan derekti QR QK-niń 121-babynyń 4-bóligi «jas balaǵa qatysty jasalǵan seksýaldyq sıpattaǵy zorlyq-zombylyq áreketteri» boıynsha tirkep, oqıǵa ornynan boı tasalaǵan kúdiktini dosynyń páterinen ustady.

«Ol buryn alaıaqtyq jasaǵany úshin sotty bolǵan. Jedel ýákilder turǵyn úıdi tekserý kezinde salmaǵy 4 kelige jýyq marıhýanaǵa uqsas erekshe ıisi bar zat salynǵan sómke tapty. Atalǵan jaıt QR QK-niń 296-baby 4-bóligi «Asa iri mólsherdegi esirtki, psıhotroptyq zattardy, sol tektesterdi ótkizý maqsatynsyz zańsyz daıyndaý, qaıta óńdeý, ıemdený, saqtaý, tasymaldaý» boıynsha tirkeldi. Birqatar saraptamalar taǵaıyndaldy. Kúdikti qamaýda. Sotqa deıingi tergeý júrgizilýde»-delingen Shymkent qalasy polıtsııa departamentiniń baspasóz qyzmeti usynǵan aqparatta.