Shymkentte nóser jaýynnan úılerdiń aýlalary men kóshelerdi sý basty

ShYMKENT. QazAqparat - Shymkentte nóser jaýynnan úılerdiń aýlalary men kósheler sýǵa tolyp ketti. Qalanyń qutqarý men kommýnaldyq sharýashylyq qyzmeti jaýyn-shashynnyń saldaryn joıýǵa jumyldyryldy, dep habarlaıdy QazAqparat tilshisi.

Qalalyq TJD baspasóz qyzmetiniń málimetinshe, Daǵdarys ortalyǵynyń jedel shtabynda úılestirý jumystary atqarylǵan. Abaı, Ál-Farabı, Eńbekshi, Turan jáne Qarataý aýdandarynda 26 kóshege jınalǵan sýdy sorǵyzý jumystary júrgizildi. Abaı aýdanynda Gagarın men Tórtkól kóshelerinde, Yntymaq bólimshesi men Temirlan tas jolynda sý sorý jumystary júrgizildi. Turan aýdanynda Qursaı men Sport shaǵyn aýdanynda, Bógenbaı batyr men Qulan tóbe kóshelerinde sýdy shyǵarý jumystary júrgizildi. Al, Respýblıka dańǵyly boıyndaǵy jer asty ótkeli sýǵa tolyp ketti.

Eńbekshi aýdanynda Qapal batyr kóshesi boıyndaǵy kópir astyna, Qarataý aýdanynda Nursat móltek aýdanyndaǵy kópqabatty turǵyn úılerdiń jer tólelerinde sý jınaldy. Bul aýmaqtarda barlyǵy 2585 tekshe metr sý shyǵaryldy. Qum toltyrylǵan 600 qap paıdalanylyp, turǵyn úılerdi sý basý jol berilmedi. Munda zardap shekkender joq. Sýdy shyǵarý jumystaryna TJ departamentiniń 150 qyzmetkeri, 37 tehnıka, 23 motopompa, bir PMP-300 jumyldyryldy. Keshke deıin Abaı aýdany aýmaǵynda sý basý qaýipi bar aýmaqtarda arnaıy kezekshi brıgadalar men ákimdik qyzmetkerleri jedel áreket etý sharalaryn júrgizdi. Qatynkópir, Maılın, Mámetova, Aqjaıyq, Edilbaev, Samal, Shubarkól shaǵynaýdandary men kóshelerinde, Ótegenov jáne Tólemetov kóshesiniń qıylysyna tehnıkalardyń kómegimen sý tartý jumysy atqarylýda. Sonymen qatar, Bekjan bazar aýmaǵyndaǵy tonnel de baqylaýǵa alynǵan. Bul jumystarǵa jaldamaly arnaıy 13 assınızator tehnıkasy qalalyq jaıly ortany damytý basqarmasymen birlese sý tartý jumystary júrip jatyr. Irrıgatsııa júıesin tazalaýǵa 80 jumysshy qyzmetkerler jumyldyrylyp, aryq-atyzdardyń bitelgen jerlerin ashý jumystaryn júrgizip, sý ótkizgish qabiletin arttyrýda. Qazirgi tańda jańbyr toqtaǵanymen, barlyq aýdan aýmaǵynan aǵyp ótetin kanaldarmen ózenderden turǵyn úılerge keletin qaýipter baqylaýǵa alyndy. Ári qadaǵalanyp jatyr.