Shymkentte nóser jaýynnan keıin bazar ishin sý basty

ShYMKENT. QazAqparat - Shymkentte qatty jaýyn-shashynnyń kesirinen bazar ishin sý basty, dep habarlaıdy QazAqparat tilshisi.

Shymkentte keshe túnnen beri nóser jańbyr jaýyp, turǵyndardy ábigerge saldy.

Al búgin tótenshe jaǵdaı qyzmeti qala kóshelerin jınalyp qalǵan jańbyr sýynan tazartyp jatyr.

Bul jumysqa 12 tehnıka, 11 motopompa jáne 37 jeke quram qyzmetkeri jumyldyrylǵan.

Al, áleýmettik jelide qatty nóserden bazarlardaǵy jaǵdaıdyń qıyndaǵanyn kórýge bolady.

Shatyrdan ótken jańbyrdan satýshylardyń taýarlary sý bolyp, jaramsyz kúıge túsken. Nóser sý bazar ishinde ózen sekildi úlken jyldamdyqpen aqqan.

«Qazgıdromet» mamandary búgin óńirde kún raıy jyly bolǵanmen, erteńnen bastap jel turatynyn habarlady.

Al, 30-31 tamyz kúnderi jańbyr jaýyp, aýa temperatýrasy tómendeıdi. Keı jerlerde naızaǵaı oınap, burshaq jaýýy yqtımal.

Aıta keteıik, keshe Shymkentte buryn-sońdy bolmaǵan burshaq jaýdy.