Shymkentte Názir Tórequlovty eske alý keshi ótti
ShYMKENT. QazAqparat - Shymkentte Názir Tórequlovtyń týǵanyna 125 jyl tolýyna oraı «Azamat. Kúresker. Dıplomat» atty eske alý keshi bolyp ótti, dep habarlaıdy QazAqparat tilshisi.
A.Pýshkın atyndaǵy oblystyq ámbebap kitaphanasynda ótken keshke jazýshy, názirtanýshy, túrkitanýshy, «Názir qory» syılyǵynyń laýreaty Sársen Bek Sahabat men Muhtar Áýezov atyndaǵy Ońtústik Qazaqstan Memlekettik ýnıvesıteti tarıh kafedrasynyń dotsenti, tarıh ǵylymdarynyń kandıdaty G.Tileýqulov pen joǵary oqý ornynyń stýdentteri, mektep ustazdary qatysty. Halyqaralyq dárejedegi dıplomatııalyq saıasatty júrgizýde ózindik úlesi bar, kórnekti qaıratker Názir Tórequlovtyń qazaq halqy úshin jasaǵan eńbegi ushan teńiz.
«Názir Tórequlov týraly el arasynda ańyz-áńgimeler kóp. Solardyń birinde Názir men Turar 1937 jyly qamaýǵa alynǵanda ózara hat jazysyp, onda olardyń el jaıyna, ult bolashaǵyna alańdaıtyny aıqyn kórinis bergen. Iá, osyndaı arda azamattardyń eli men jeri úshin jasaǵan eńbegin búgingi urpaq umytpaýy tıis. Sondyqtan Alash zııalysynyń ult úshin jasaǵan eńbekterin únemi eske alyp otyrýymyz kerek», - dedi Sársen Bek Sahabat.
Odan soń sóz alǵan G.Tileýqulov N.Tórequlovtyń qazaq tilinen ózge, túrik, arab, parsy jáne orys tilderin jetik meńgergenin, sondaı-aq shyǵys ádebıetin, tarıhyn tereń bilgeni jaıly aıtyp ótti.
Keshte Názir Tórequlovty eske alýshylar ulttyń uly qaıratkerin qazaqtan shyqqan tuńǵysh elshi jáne ǵalym-aǵartýshynyń solaqaı saıasattyń qurbany bolǵanyn da áńgime etti.
Aıta keteıik, Shymkentte búginde ortalyq kóshelerdiń biri men mektep tanymal tulǵa Názir Tórequlovtyń atymen atalady.
