Shymkentte Naýryz meıramy qarsańynda halyqqa tegin nan taratyldy
Naýryz meıramy qarsańynda uıymdastyrylǵan sharada halyq as atasy - nandy qalaýlarynsha aqysyz alyp jatty. Arnaıy kólikpen jetkizilgen nan ortalyq kóshelerdiń birinde úlestirildi. Jalpy, shaǵynaýdanda resmı túrde 308 otbasy turady. Olardyń basym bóligi - kópbalaly jáne áleýmettik jaǵdaıy tómen otbasylar. Sondyqtan, atalmysh is-shara osynda uıymdastyrylǵan. Óz kezeginde kópbalaly analardyń biri Sálıma Halmetova azyq-túliktiń baǵasy sharyqtaǵan tusta bir kúndik nannyń tegin taratylýynyń ózi úlken kómek dep otyr.
«Bizder úshin bir kún bolsa da nannyń tegin berilýi kómek, kópbalaly bolǵandyqtan. Sebebi, tabysymyz az bolǵandyqtan bárine birdeı jetkize almaımyz. Tamaq ta, kıim de qymbattap jatyr. Myń alǵys kóktem merekesin eskerip, bizderdi qoldap otyrǵandaryna. Osyndaı is-sharalar kóbeıe bersin», - deıdi kópbalaly ana.
Jergilikti bılik pen qoǵamdyq qor muryndyq bolǵan sharaǵa jeke kásipkerler de úlesin qosty. Jańarý men jasarýdyń mezgilinde osyndaı ıgilikti istiń jasalǵany qarapaıym halyqty bir qýantyp tastady.