Shymkentte «Naýryz kóktem-Shymqala» aıtysy ótti

ShYMKENT. QazAqparat - Shymkenttegi «Túrkistan» saraıynda Ulystyń Uly kúni Naýryz merekesine oraı  «Naýryz kóktem-Shymqala» aıtysy ótti. Ulystyń uly kúnin ulyqtaýǵa arnalǵan bıylǵy aıtystyń ereksheligi -dástúrli túrdegi doda baǵytynda emes, aıtys-shoý túrinde uıymdastyryldy, dep habarlaıdy  QazAqparat tilshisi.

Jyr dodasyna elimizge belgili 14 aıtysker aqyn qatysyp, baqtaryn synady. Aqyndar Qazyǵurttan bastaý alǵan áz Naýryz merekesi men Elbasy N. Nazarbaevtyń "Bolashaqqa baǵdar:rýhanı jańǵyrý" baǵdarlamalyq maqalasy aıasynda úlgi bolarlyq ońdy isterdi aıtysqa arqaý etti. Shymkent qalasynyń shyraıly kelbeti men ósip-órkendeýin tilge tıek etti. Aıtystyń shymyldyǵyn ońtústiktiń ot aýyz, oraq tildi aqyny Bekarys Shoıbekov pen Almaty oblysynyń dúldúli Syrym Áýezhan ashsa,  Ońtústiktiń aıtyskeri Anar Japparqulova men tarazdyq Áset Dúısebaev rýhanı keshti ári jalǵady. Odan keıin Batys Qazaqstan oblysynan kelgen Talǵat Myqı men taldyqorǵandyq Sara Toqtamysova, Batys Qazaqstan oblysynyń aıtyskeri Muradym Mırlanov pen ońtústiktik Jarqynbek Naýshabekov halyqty sulý sózdermen sýsyndatty. Astana qalasynyń aıtys júırigi Balǵynbek Imashev pen jerlesimiz Nurlan Esenqulov jáne astanalyq  Aınur Tursynbaeva men shymkenttik Qajymuqan Abzalovtardyń aıtysy da kópshiliktiń kóńilinen shyqty. Al, astanalyq adýyndy aqyn Jandarbek Bulǵaqov pen Aqtóbe oblysynyń shaıyry Danııar Aldabergender  de aıtystyń tamasha úlgisin kórsetti.

 Aıtys sońynda «Qulmanbet aıtys» óneri uıymdastyryldy.